BERLÎN – Ararat Berlin û TekoJIN ji bo jinên ciwan ên Kurd û Ermenî perwerdehiya xweparastinê ya du rojî li dar xistin. Armanca organîzekirina perwerdehiya xweparastinê xurtkirina laş û mijî, bihêzkirina hevgirtina jinên ciwan bi hev re.
Di roja yekem a perwerdeyê de, mijara parastina giyanî û psîkolojîk di çarçoveya bîrdoziya rizgariya jinan de hate nîqaşkirin. Roja ewil perwerdeyê ji hêla TekoJIN ve hate pêşkêşkirin. Di vê roje de, têgeha “hêz” ne tenê wekî taybetmendiyek fîzîkî, lê di heman demê de wekî berxwedana bi hesten xwe û nîşandayina sînoran hate nîqaşkirin. Beşdaran li ser rêbazên parastina psîkolojîk li dijî zextên ku ew di medyaya civakî, malbat, dibistan û têkiliyên kesane de pê re rû bi rû dimînin nirxandin û nîqaş kirin. Girîngiya a parastina giyanî û psîkolojîk parastineke li dijî hemû îhtîmalên manîpulekirin û gefan e.
Di roja duyemîn a çalakiyê de, di bin rêberiya mamosteyên Ararat Berlin û TekoJIN de tetbîqatên parastina pratîkî hatin kirin. Beşdaran teknîkên bingehîn ên boks û lêdanê, û her weha rêbazên revîn û parastinê ji werzîşên şer ên cûrbecûr fêr bûn. Ji bilî parastina fîzîkî, armanc ew bû ku perwerdehiya xwebaweriyê û hişmendiya laş xurt bike.
Perwerde bi çalakiyek çandî bi dawî bû. Beşdaran bi hev re govendên gelêrî yên Ermenî û Kurdî fêr bûn, di heman demê de li ser dîrok û wateyên van govendan jî nîqaş kirin. Ev çalakî her wiha aliyê çandî yê têkoşîna azadî û jinan jî destnîşan kir.
Ararat Berlin û TekoJIN diyar kirin ku perwerde dibe alîkar ji bo bihêzkirina jinan û çalakiyên bi vî rengî wê di serdema pêş de jî berdewam bikin.
