NAVENDA NÛÇEYAN – Navenda Ragihandin û Çapemeniyê ya HPG’ê têkilî gerîlayê ku li Xerzanê şehîd bûyî wiha got:
”12’ê Hezîranê artêşa Tirk a dagirker li qada Şehîd Mizgîn a Eyaleta Xerzanê operasyonek daye destpêkirin û ev operasyon heta 15’ê Hezîranê dom kiriye. Di vê operasyonê de zarê hêja yê Xerzanê û fermandarê dilêr hevrêyê me Zerdetş Navdar 14’ê Hezîranê şehîd bûye.
Agahiyên nasnameyê yê hevrêyê me yê şehîd wiha ye:
Nasnav: Zerdeşt Navdar
Nav Paşnav: Samet Îçyer
Cihê Bûyinê: Adilcewaz
Navê Dê û Bav: Nazê – Bekir
Dem û Cihê Şehîdbûnê: 14 Hezîrana 2021’an /Xerzan
Hevrêyê me Zerdeşt li navçeya Edilcewayê ya Bedlîê li nav malbateke welatparêz û xwedî çanda berxwedanê ya gelê Kurd çêdibe. Li derdora malbata ku lê mezin bûyî ji bo ku berdêl hatibûn dayin, tevlî nav Têkoşîna Azadiyê ya Kurdistanê bûne û şehîd dane hê zû hîsên welatparêz pê re şîn tên. Têkoşîna gerîla ya li herêma ku lê mezin bûyî û şehadet zehf tesîr li ser hevrêyê me Zerdeşt kiriye û bi vê bingehê ketiye nav lêgerînan.
Hevrêyê me Zerdeşt piştî ku diçe zanîngehê lêgerîna xwe didomîne, tevgera Apoyî ji nêz ve nas dike û tevlî nav tevgera ciwanan dibe. Vê navbeynê li nav tevgera ciwanan dixebite, lê li vir bûye şahidê zext û zilma dijmin, piştî destgîrkirinê bi demeke kurt tê girtin û nîşan daye ku di nav pergala dewletê ya TC’ê de cih ji Kurdan re nîne. Fêhm dike ku tenê bi xebatên ciwanan ev pergala faşîst hilnaweşe û jiyana azad a Kurdan encex bi têkoşîna gerîla ya çekdarî dibe. Bi vê bingehê sala 2011’an li Eyaleta Amedê tevlî nav refên Gerîlayên Azadiyê yên Kurdistanê dibe.
Hevrêyê me Zerdeşt ku li bakurê Kurdistanê tevlî nav refan bûyî, bi kelecanî, meraq û baldariyeke zêde jiyana gerîla serifandiye, zû hînî wê bûye. Roj bi roj hînî şêwaza jiyana azad a çiyayên Kurdistanê bûye, ziyanên ku pergala modernîteya kapîtalîst li ser kesayata wî çêkirî ji ser xwe avêtiye. Bi çarçoweya îdeolojiya Apoyî xwe, gel, nasname, dîroka xwe û rastiya dijmin xweştir nas kiriye û hay ji hebûna xwe çêbûye. Bi vê hişmendiyê têkoşiyaye, bîreweriya wî ya kûr a şoreşger kiriye ku bibe milîtanê Apoyî yê karîger. Di pratîka bakurê Kurdistanê heq ji hemû astengiya derketiye, bêderfetî û zor û zehmetî kiriye sedema têkoşînê. Bi vê meşa xwe di nav pratîka dijwar de dibe fermandar.
Sala 2014’an dema ku DAÎŞ û faşîzma TC’ê bi hevkarî berê xwe da Kobanê û ji bo ku qira Kurdan bînin bi hovîtî êrîş anîne hevrêyê me Zerdetş ji Xerzanê bi rê ket, xwe gihandiye Kobanê, ji vê êrîşa faşîst re gotiye ‘raweste’, bûye yek ji wan milîtanê dilêr ê Apoyî. Li Kobanê tevlî nav gelek çalakiyan bûye, êrîşên DAÎŞ’ê bi hostatî pûç kiriye, du caran birîndar bûye lê bêyî ku ziwêr bibe heta ku Kobanê azad bike têkoşiyaye.Piştî ku peywira xwe ya dîrokî bi layiqî bi cih tîne derbasî Qadên Parastinê yên Medyayê dibe, li ser hîmê ku dersan ji Berxwedana Kobanê û gerîlatiya Bakur derxîne, li akdemiya leşkerî perwerdehiyê dîtiye. Îdîaya û biryardariya xwe geştir kiriye, ji pratîkê re xwe hazir kiriye, di xebatên Biryargeha Navendî de bi peywirên girîng rabûye. Piştî ku li qadên perwerdehî û hûrbûnê ya navenda partiya me PKK’ê dimîne li herêma Geverê dibe endamê fermandariya eyaletê.
Hevrêyê me xwedî sekneke îdeoloîk, bi pîvanên xwe zelal bû, hîseke mezin a pêewlebûnê dida hevrêyên xwe û siberoja wî ronak bû. Bi pratîk û tecrûbeya ji perwerdehiya partiyê standî û hûrbûneke xurt ji bo ku xeta gerîlayê serdema nû li bakurê Kurdistanê pratîk bike, ji bo ku weke fermandarekî zîrek ê Apoyî pêşengî bike berê xwe da xaka Xerzanê. Hevrêyê me Zerdetş Navndar ku hêviyên mezin dida 14’ê Hezîranê bi bombebaranê şehîd bû. Meşa şoreşerê ya Apoyî ku hevrêyê me Zerdeşt bi lehengî, bênavber û bêdudilî domandî her demê ji aliyê me hevrêyên wi ve wê mînak were dîtin. Bîranîn û xeyalên wî bi serfiraziya meşa me ya Kurdistana Azad, Rêbertiya Azad herdem were jiyîn.
Bi vê bingehê di serî de malabata hêja ya welatparêz a hevrêyê me yê leheng, sersaxiyê didin gelê Xerzanê û gelê Kurdistanê yê welatparêz.”
