WAN – Cenazeyê Mehmet Zekî Çelebî serê sibê anîn Wanê. Hêzên dewleta Tirk roja Pêncşemê beriya merasîmê ji êvarê ve rêyên ber bi Goristana Selîmbeyê girtin.
Polîsên Tirk li pêşiya bajêr karwanê cenaze rawestand û li malbatê ferz kir ku tenê 15 kes karibe biçe goristanê.
Endam û rêveberên Partiya Demokratîk a Gelan (HDP) û Partiya Herêman Demokratîk (DBP), rêxistinên navçe û bajêr yên Wanê, parlamenterên HDP’ê Mûrat Sarisaç, Mûazzez Orhan, Mehmet Sidik Taş û nûnerên rêxistinên girseyî yên demokratîk ên bajêr jî di nav de gelek kes ji bo tevlî merasîmê bibin li hev civiyan. Lê belê ji aliyê polîsan ve hat astengkirin.
LI CENAZEYÊ KURDAN JÎ ZILMÊ DIKIN
Parlamenterê HDP’ê Mûrat Sarisaç nerazîbûn tund nîşanî polîsan da û got, “Defnkirin mafê herî xwezayî ye. Rewşeke wiha di kîjan olê de derbasdar e? Jixwe hûn bi qanûnî sûc dikin, niha jî hûn bi olî sûc dikin. Hûn gelê Kurd dikujin, paşê jî zilmê li miriyan dikin. Em vê çewisandinê ti carî qebûl nakin, em ê li navenda bajêr bi girseyek mezin vê yekê protesto bikin. Bêguman ji ber ku hûn şirîkê kuştinê ne hûn destûrê nadin. Li welatê herî faşîst ê cîhanê pratîkeke bi vî rengî nîne. Hûn li vir zilmê li gelê Kurd dikin.”
EŞQIYATIYÊ DIKIN
Parlamentera HDP’ê Mûazzez Orhan got, “Li vir eşqiyatiyê dikin. Hûn ewlehiyê çi digirin? Ger SADAT, JÎTEM, MÎT’ê ev cînayet pêk neanîbana, we yê destûrê bidina me ku em beşdarî merasîma cenaze bibin. Bi pratîka xwe hûn jî dipejrînin ku we ew kuştiye. Hûn sûc dikin. Ma qet mirovatî û wijdanê we nemaye?”
Parlamenterê HDP’ê Mehmet Sidik Taş jî got, “Hûn li vir sedema qedexeyê jî nikarin nîşan bidin. Ev yek nedestûrî ye, kî dikuje ew asteng dike.”
Piştî nîqaşê dema gel xwestin bikevin goristanê ji aliyê polîsan ve hatin astengkirin alozî derket.
Polîsan bi girtina deriyê goristanê êrişî gel kirin. Kesên hatin merasîmê bi qîrîna dirûşma “Şehîd Namirin” polîs şermezar kirin.
LI CIHÊ KU KUJER BIBÎNIN ÊRIŞÎ CENAZEYÊN ME DIKIN
Malbata ku di dema dorpêça polîsan de cenazeyê Çelebî veşart, hate qada ku girse li bendê bû û li vir daxuyanî da.
Birayê Çelebî Fevzî Çelebî jî wiha got: “Birayê min 13 sal in li xerîbiyê bû. Me xwest li welatê ku lê ji dayik bûye bibînin; lê nehiştin em cenazeyê wî jî binax bikin. Ger ev ne zilm e, çi ye? Polîs tên cem min û dibêjin ‘devê xwe venekin’. Ev ji bilî zilmê ne tiştekî din e û em vê rewşê qebûl nakin. Divê hikûmet dev ji vê zîhniyetê berde. Dewlet li cihê ku kujer bibîne tê û êrişî merasîma cenaze dike. Weke malbata wî em li dijî vê bêhiqûqiyê ne. Gelek spas ji bo her kesê ku hatine. Mehmet Zekî Çelebî ne tenê şehîdê malbata xwe ye, şehîdê hemû Kurd û Kurdistaniyan e.”
