NAVENDA NÛÇEYAN – Fermandariya Giştî ya YPG’ê bi daxuyaniyeke nivîskî fermandar Xebat Dêrik di salvegara şehadeta wî de bi bîr anî.
Di daxuyaniya fermandariyê de wiha hate gotin:
“Em di serî de salvegera 11’emîn a şehadeta pêşeng û fermandarê me şehîd Xebat Dêrik bi rêz û bi minetdarî bi bîr tînin.
Ji destpêka mirovahiyê heta roja me ya îro di her avakirina welatekî ango destpêkirina şoreşekê de di nav wî gelî de mirovên xwedî cesaret, bi zane û xwedî taybetmendiyên pêşengê pê re ne, derdikevin. Ji bo şoreşa Rojava û Bakur û Rojhilatê Sûriyê jî mirovên heman xwedî van taybetmendiyan e, derketin ser dikê û çarenûsa gelê xwe guhertin. Yek ji wan pêşenga şoreşa me şehîd Xebat Dêrik e.
Di salên dûr û dirêj de ku tovên jiyaneke azad li vê derê hatibûn avêtin, sala 2011’an de şîn bû, mezin bû û belavê tevahî dinyayê kir. Bi pêşengiya şehîd Xebat gel hat rêxistinkirin, deskeftiyên şoreşê çawa were parastin hat perwerdekirin. Eger şoreşek ê bi ser bikeve pêwîst e bingehên wê zexm bin. Şehîd Xebat bingeheke zexm ava kir. Bi taybet gelê Kurd ku bi hezaran salan e ji derveyî xwe ji her kesî re leşkerî dikir, vê carê tenê ji bo xwe leşkerî bike, li ser esasê parastina cewherî artêşek ji yekîneyan hat avakirin. Gelê herêmê ku ji Kurd, Ereb, Suryan û ji pêkhateyên cur bi cur pêk tê, anîn gel hev. Îro avabûyîna pergala demokratîk a gelan îspata wê ye. Şervanên şehîd Xebat ku ji hemû pêkhateyan bûn di heman çeperan de mil bi mil bûn. Vê hişt ku berxwedana me bi ser bikeve. Bi saya bi hezaran heval û hogirên me yên ku bi fedakarî, bi ked û xebatên xwe gihandin astekê û di demên herî zehmet de xwe kirin mertal li hember dagirkeriyê canê xwe feda kirin. Mîrateya ku şehîd Xebat û hemû şehîdên me ji me re hiştiye bi qasî bi dehan şoreş çêbin.
Şoreş, encax bi şexsiyetên xwedî karakterên mezin pêk tên. Şehîd Xebat xwedî karaktereke mezin bû. Ew tecrubeyên bi salan, bûbûn karakterek. Coş û kelecana wî, fedakariya wî, sekna wî ya qet ranaweste di demeke kurt de di avêtina gavên mezin de diyarker bû. Di demeke kurt de bingeha damezirandina YPG’ê amadekirin nîşaneya vê ye. Fermandar Xebat bi damezirandina Yekîneyên Parastina Gel (YPG) gavekî dîrokî avêt. Heval Xebat ku di sekna xwe ya fermandartiyê de şêwaza fedayane afirandibû, ev bû wesîleya pêşxistina şervantiya bi dîsîplîn li dij her cûre paşverûtiya li Kurdistanê û Rojhilata Navîn de bê pejirandin. Wî ku di şer de tecrubeyên bi salan di xwe de bi pêş xistibûn, bi avakirina YPG’ê re daîmî kirin.
Em Fermandariya Giştî li ser tevahî hêza me ya YPG, di şexsê şehîd Xebat Dêrik de ku 14’ê Çileya 2012’an gihîşt şehadetê û fedakariya deh hezar şehîdên me, îro li Rojava û Bakur û Rohilatê Sûriyê deskeftiyên bi dest xistine, biparêzin. Careke din soza xwe dubare dikin ku em ê li mîrateyên şehîdên xwe xwedî derkevin û em hemû şehîdên xwe bi minet bi bîr tînin.”
