NAVENDA NÛÇEYAN – Kordînasyona Tevgera Ciwanên Şoreşger û Yekitiya Jinên Ciwan ên Suriyê di derheqê êrîşa Dewleta faşîst ya Tirk a ku li Kobanê de pêk hat daxuyaniyeke nivîskî da.
Daxuyaniyê de tê diyar kirin ku “Wek tevgera Ciwanên Şoreşger û Yekîtiya Jinên Ciwan emê soz û biryardariya Şehîd Viyan Kobanê, Şehîd Nujiyan Ocelan, Şehîd Rojîn, Şehîd Welîd û Şehîd Merhef bixin bingeha mezin kirina têkoşîn û çalakvaniya xwe û bibin tolgerê soza wan.” Bi vê daxuyaniyê ve Kordînasyona Ciwanan soza tolhildanê dide.
Bi tevahî daxuyaniya Kordînasyona Tevgera Ciwanên Şoreşger a Suriyê û Yekitiya Jinên Ciwan wiha ye:
“JI BO RAYA GIŞTİ:
Em wek Tevgera Ciwanên Şoreşger ê Suriyê û Yekîtiya Jinên Ciwan ji destpêka Şoreşa Rojava heya vê kêliyê dinav ked, kar û berxwedana şoreşgerî û welatparêziyê de bênavber têkoşînê dimeşînin. Me ji destpêka avakirina şoreşê de vê têkoşîna xwe bi gelek şehadetên bi nirx tacîdar kiriye û bi soza tolhildan, girêdanbûn û mezin kirina mîrateya xeta şehîdan, xwe gihandiye asta nûnertiya şoreşê. Tevgera Ciwanên Şoreşger bi hêz, îrade, sekin û çalakvaniya xwe ya ciwantiyê buye tirsa dilê tevahî dijminên dijî şoreşê û hevkar û xayînên wan. Tevgera Ciwanên Şoreşger û Yekîtya Jinên Ciwan ji destpêka avabûna xwe heya roja îro li hember her cure êrîşên dijmin yên li hember welat û şoreşê û hevkarên wan yên xiyanetkar bûne xwedî sekin û hêza çalakvaniyê. Ji ber vê sedemê ye ku di her demê de bi pêşengtiya dewleta Tirk a dagirker de bûye hedefa tasfiye kirina hêzên faşîst û hevkarên wan yên xiyanetkar. Ev êrîşên ku pêşdikevin jî bi armanca tasfiye kirina Tevgera Ciwanan e. Tevahiya ev hêzên faşîst û hevkariya xiyanetkar ji bo pişavtin, helandin û bi temamî tasfiye kirina ciwanan tavahiya derfetên xwe seferber kirine û heya vê kêliyê jî dinav pêkanîn wî de ne. Herî dawî li bajarê Kobanê di esnaya xebatande li malbatekî endamên me û ew malbat ji aliyê faşîzma dewleta tirk de bi êrişa hewayî hatine hedef girtin û 5 hevalê me hatine şehîd xistin.
Em wek Tevgera Ciwanên Şoreşger û Yekîtiya Jinên Ciwan ne cara yekê ye bi êrîşan re rû bi rû dimînin. Ev êrîş wek konseptekî ji destpêkê ve heya niha têne pêşxistin. Tevahiya van êrîşên ku heya niha li dijî Tevgera Ciwanên Şoreşger hatine kirin jî qat bi qat bi sekin, bi rêxistinbûn, bi çalakbûn û her cure parastinê ve hatine bersivandin û tol hatiye girtin. Bila tevahiya hêzên faşîst, dagirker û xeta îxanet û hevkariyê baş bizanibe ku wek tevahi êrîşên beriya van, wê ev êrîş jî bi tu awayî bê bersiv û bê tolhildan nemînin. Wek Tevgera Ciwanên Şoreşger û Yekîtiya Jinên Ciwan emê soz û biryardariya Şehîd Viyan Kobanê, Şehîd Nujiyan Ocelan, Şehîd Rojîn, Şehîd Welîd û Şehîd Merhef bixin bingeha mezin kirina têkoşîn û çalakvaniya xwe û bibin tolgerê soza wan. Wek tevgera Ciwanên Şoreşger û Yekîtiya Jinên Ciwan ji tevahiya gelê me û ciwanan re soza me ye ku emê van êrîşan jî bi hîn zêdetir îradebûn, çalakbûn û şoreşgerbûnê bibersivînin. Tevgera Ciwanên Şoraşger ji destpêka avabûna xwe de wek berpirsiyar û çalakvanê tola dîrokî xwe rêxistin kiriye û di xeta tolhildanêde bûye xwedî têkoşîn û çalakî. Bi vê çalakvanî û tolgeriya xwe hertim bûye tirsa dilê tevahî dagirker, faşîst û xiyanetkaran. Îro jî tola her ciwanên ku bi destê faşîzmê û xeta hevkariya îxanetkar hatine şehîd xistin wê bi pratîk, bi çalakî û bi hezaran şoreşgerbûn û şervanbûnê were bersivandin. Ji tevahiya gel û ciwanan re soza me ye ku emê bi çalakbûna hêza ciwantiyê bibin şopdar û çalakvanê soz û tolhildana wan.
Kordînasyonên Tevgera Ciwanên Şoreşger û Yekîtiya Jinên Ciwan
27. 12.2021″
