Dil bi girîn e û çav hêsiran dibarîne
Payîz e li çiyayê Gabarê
Pel weşîn ji gulyên darê
Bû Payîz û bi rengê zêrîn xwe xemiland
Ji bo rêkirina heft gulên Biharê
Sor gulên ku navên xwe bi neqşa zêrîn nivîsandin.
Di nav dilê Gabarê de
Sor gulên ku zeml û şemala xwe dabûn Gabarê
Bilbil dixwîne û dilorîne li ser sê awazan
Gulên nû bibûn xemla wê li Gabarê
Digrî Bilbil li ser Xwînda, Serdem û Gulbiharan
Rondik ji çav, xwîn ji birîna dil tê xwarê
De negrî hevala min negrî
De negrî û bi lêvên diricifin nepeyvîne
Peyvên dil dişewtîne û digrîne
De negrî Gabara min negrî bi çavên ku
Gelek qehremana dîtiye
De negrî bi çavên ku gelek leheng û fermandarên
Mîna Adil û Gulbiharan dîtiye
De negrî bi çavên ku gelek Egîdên
Mîna Rozerîn, Harûn û Bêrîtanan dîtiye
De negrî Gabara min negrî
De negrî Gabara min
Bi çavên ku gelek ciwanên
Mîna Xwînda û Serdema dîtiye
De negrî dilê min negrî
De negrî li ser Evîndarên azadiyê
De negrî hevalên min negrîn
Li ser veqetînên di tariyê de
Dibin stêrk.
De negrî dayê negrî
Li ser dest û sîngê ku
Gelek zarokên azad mezin kiriye
De negrî Payîza min negrî
De negrî Gabara min negrî
De negrî
Ş. Seyda Serdem
Bagok
