BEHDÎNAN – Li çiyayên Kurdistanê hember êrîşên dagirkeriya dewleta Tirk keç û xortên dil wêrek her roja diçe, asta berxwedan û têkoşîna xwe hîn bilintir dikin. Yek ji wan gerîlayên berxwedêr Demhat Kobanê ye ku di nava pêngava şoreşgerî ya Cenga Xabûrê de rêneda dagirkeran û bi vî awayî şehîd bû. Berya biçe çalakiyê hestên xwe bi ANF’ra parve kir û got; ‘Em bi îradeya xwe şer dikin, hêza xwe ji berxwedaniya Zendûra’yê digrin. Ji ber vê berxwedan jiyan e.’
‘HETA KU GERÎLA LI ÇIYAYÊN KURDISTANÊ BE DAGIRKER TI CARÎ NIKARE ENCAMÊ BIGIRE’
Gerîla Demhat ji destpêka pêngava şoreşgerî ya Cenga Xabûrê de cîh girt û her tim bi çekên giran derbên mezin li dagirkeran da. Bê rawestandin berê xwe da çeperên ku şerên dijwar lê diqewimiya. Cîhê ku gerîla Demhat û çekên wî hebûya dagirker nekarîn rehet tevbigerin. Di nava Cenga Xabûrê de şer kir û di 15’ê Hezîranê de li qada Koordîne ji bo ku pêşiya dagirkeran bigre heta guleya xwe ya dawî şer kir, canê xwe kir mertal û şerhîd bû. Berya biçe çalakiyê hestên xwe wiha anî ziman; “Di Cenga Xabûrê de berxwedaniyek pir mezin tê meşandin. Dijmin bi hemû hêza xwe êrîşê tevgera me ya azadiyê û gerîla dike. Hemû hewldanê wan ji bo dagirkirina axa Başûrê Kurdistanê ye. Heta ku em li serê çiyayên azad jiyan bikin emê ti carî nehêlin axa Kurdistanê werê dagirkirin. Bersivê pêwîst emê bidin. Heta dawî emê berxwe bidin. Dijmin hemû derfetên xwe kar tîne lê em bênavber çalakiyan dikin û berxwedaniya xwe jî mezintir dikin. Dagirker bi teknîkên xwe dixwazin encam bigrin lê beramberî berxwedaniya gerîla nikarin pêş de werin. Heta ku em li serê çiyayên Kurdistanê bin ti carî nehêlin dagirker bigihîjin armanca xwe lewra emê her tim asta berxwedanê mezintir bikin.”
‘DIVÊ CIWANÊN BAŞÛR TEVLÎ VÊ BERXWEDANÊ BIBIN’
Demhat Kobanê bi çanda berxwedêr ya Kobanê ve mezin bûye, bi vê ruhê ve dibêje ‘Ev der axa Kurda ye, ti carî dijmin nikare derbas bibe’ Banga ciwanên Başûrê Kurdistanê dike û wiha dibêje; “Dijmin dixwaze Başûrê Kurdistanê dagir bike û li pêşiya wê jî tevgera me PKK dibe asteng. Ji ber vê banga me ji bo gelê me yê Başûr û ciwanan heye; divê tevlî vê berxwedanê bibin û Başûrê Kurdistanê biparêzin. Dewleta Tirk a dagirker dibêje ‘emê PKK’ê tine bikin’ lê di rastiyê de dixwazin Başûrê Kurdistanê dagir bikin ji ber vê êrîş dikin. Ji ber ku bi navê Kurdistanê naxwazin ti kes jiyan bike. Lê emê heta dawî gelê xwe biparêzin, divê ciwanên Başûrê Kurdistanê jî piştgiriya vê berxwedanê bikin, tevlî bibin.”
‘TEKNÎKÊ DIJMIN TI CARÎ BI SER NAKEVE, JI BER KU ÎRADEYEKE JI POLA YA GERÎLA HEYE’
Gerîla Demhat Kobanê di nava pêngava Cenga Xabûrê de bi hostayî gelek çalakiyên bi serkeftî li hember artêşa Tirk ya dagirker pêk anî. Hemû çekên destê xwe de bi hostayî dişixulîne û kêliyên dawî ku biçe çalakiyê bi biryardarî wiha dibêje; “Niha êrîşên pir dijwar hene lê em bi çekên giran her tim di nava çalakiyan de ne. Bila dewleta Tirk baş bizanibe ku teknîkê wan ji bo me ne tiştek e ji ber ku îradeya me heye. teknîk li hember îradeya me nikare bisekine. Em hêza xwe ji berxwedaniya Zendûra’yê digrin. Lewra berxwedan jiyan e.”
