WAN – Li hemberî desteserkirina şaredariyan nobedên demokrasiyê di roja 38’an de didome.
Nobeta li Wanê li pêşiya Avahiya HDP’ê ya Rêya Hevrîşmê hate lidarxistin. Parlementerên HDP’ê, hevşaredar, Dayikên Aştiyê, çalakgerên TJA’yê û gel tevlî nobedê bûn.
Parlementera HDP’ê Nûran Îmîr di çalakiya nobedê de axivî û got ku “Me tu caran li hemberî van darbe, derew û hîleyan stûyê xwe xwar nekir. Îro jî bloka faşîst a AKP û MHP’ê li ser gelê Kurd û têkoşerên demokrasiyê operasyonên qirkirina siyasî li dar dixin. Ew her meh sindoqan li kolanên Wanê deynin wê gelê Wanê dîsa îradeya xwe ya nîşan bide û biryara xwe bide. Wan hemû tiştên li ser navê hiqûq û heq ji holê rakirine. Vê têkoşîna me ji bo bidestxistina van nirxan e. Çiqasî zor û zehmetî hebe jî, em ê bi gelê xwe re bin.”
Îmîr bal kişand ser pergala hevserokatiyê û got ku “Li her kolan û malê em ê pergala hevserokatiyê ava bikin û em ê her derê bikin dibistana demokrasiyê û em ê bi gelê xwe re bin.”
Çalakiya nobetê bi stran û sloganan bi dawî bû.
