NAVENDA NUÇEYAN- Ciwanên Partiya Yekitiya Demokratîk (PYD), li navenda giştî ya PYD’ê ya li Qamişloyê bi diruşma “Bi berxwedana jin û ciwanan em ê civakeke demokrat û azad ava bikin” panelek li dar xist.
Di panelê de du mijar hatin nîqaşkirin; ya yekemîn li ser siyasetên li ser ciwanan tên meşandin û ya duyemîn rola ciwanan di Sûriyeya nû de.
Mijara yekemîn ji aliyê rêveberê Nivîsgeha Rêxistinî ya PYD’ê Telat Yûnis ve hat birêvebirin.
Yûnis diyar kir ku tevahî cîhan di nava şer û pevçûnên dijwar re derbas dibe û got: “Şerê ku niha li herêmê û tevahî cîhanê rû dide, Şerê Cîhanê yê Sêyemîn e. Li her derê li dijî civak û xwezayê şer, kuştin, talankirin û wêrankirin heye. Yên ku van şeran didin meşandin dewletên hegemonîk in, armanca wan li hember hêzên demokratîk ên ji nava civakê ji bo parastina xwe derdikevin, parastina sîstema xwe ya hegemon bikin. Bi her cureyî êriş û talaniyê dikin ku tenê hebûn û sîstema xwe li ser lingan bihêlin û xurt bikin.”
Yûnis anî ziman ku ev şer herî zêde bandorê li ciwanê û xwezayê dike, bi taybet jin û ciwanan. Yûnis got: “Jin û ciwan di civakê de yên herî dînamîk in, ji lew re desthilat berî her tiştî dixwaze hêza wan têk bibe, ku karibe civakê teslîm bigire.”
Di dawiyê de Telat Yûnis got ji bo ku civak hêza xwe ji dest nede û nirxên wê werin parastin erka dikeve ser ciwanan ew e ku ji çand û kultûra xwe bi dûr nekevin.”
Mijara duyemîn a têkildarî rola ciwanan di Sûriyeya nû de ji hêla rêveberê komîteya aborî ya ciwanên PYD’ê Şiyar Xalo hat nirxandin.
Xalo destnîşan kir ku rola ku dikeve ser ciwanan ew e ku ji çand, urf û adatên xwe bi dûr nekevin, nekevin xefka çandên biyanî ku dûrî çandên wan e û got: “Ger em xwe dûrî çanda xwe bibînin û çanda xwe neparêzin, em ê di nava çandên biyanî de bihelin û nikarin destkeftiyên heta niha hatine bidestxistin jî biparêzin.”
Xalo da zanîn ku weke mînak li dewletên Ereban ên ku şoreşê lê çêbûne, welatiyên wan dewletan dibêjin ku wan şoreş bi ser xist. Lê di bingeh de tenê kes hatin guhertin, pergal heman pergal e.
Xalo di dawiyê de got: “Ji bo ku em destkeftiyên şoreşa xwe biparêzin, divê em rola xwe di avakirina Sûriyeya nû de bilîzin û projeya ku li Bakur û Rojhilatê Sûriyeyê tê meşandin li tevahî Sûriyeyê belav bikin û bi cih bînin.”
