Fermandariya Yekîneyên Parastina Rojhilatê Kurdistanê (YRK) fermandarê mezin Simko Serhildan (Mecîd Kaviyan) di salvegera 11’emîn a şehadeta wî de bibîr anî û bang li jin û ciwanên Rojhilatê Kurdistanê kir û ragihand; “Çawa rêheval Simko sala 1999’an li hemberî komploya navnetewî ya li ser Rêber Apo tevlê nav refên gerîla bû û tevlî vê şoreşa ku Rêber Apo pêşxistî bû û heta nefesa xwe ya dawî bi lehengî têkoşiya û li hemberî hemû zalim û dagirkerên her çar beşên Kurdistanê têkoşiya, hûn jî werin tevlê nava refên gerîla bin.”
Berfirehiya daxuyaniyê bi vî rengî ye:
“Em fermandarê mezin Simko Sehildan (Mecîd Kaviyan) di salvegera 11’emîn a şehadeta wî de bibîr tînin. Di kesayeta heval Simko de bejna xwe li ber hemû şehîdên şoreşa rizgariya gelê me li hemû beşên Kurdistanê bi taybetî şehîdên ku di şerê ferzkirî yê rejîma dagirker a Îranê ya sala 2011’an li rex fermandar Simko û bi pêşengiya wan hevalên leheng bûne sembola yek ji berxwedanên mezin û dîrokî, ditewînin. PJAK’ê di destpêka sedsala 21’an de mezinahî û heybeta gelê me parastiye û bi xwîna xwe ya pak nehiştin ku dagirker bigihîjin armancên xwe, em careke din wan bi bîr tînin.
Piştî derbasbûna 11 salan li ser wê şehadetê, PJAK, Yekîneyên Parastina Rojhilatê Kurdistanê û Hêza Parastina Jinên Rojhilatê Kurdistanê li ser bingehê wan destketiyên ku ji hêla siyasî, leşkerî û civakî ve bi dest aniye, me xebat û têkoşîna xwe di kûrahiya vê beşa xaka Kurdistanê roj bi roj li ser esasê pêşxistina fikir û felsefeya Rêber Apo ji bo zanakirina gelê me li hemberî zilm û zora dagirkeran bi xweparastin û pêşxistina nirxên civakî û avakirina gelekî azad û demokratîk ku çawa xwe weke Destana Qendîlê ya serfiraz û bi cesaret bi pêşengiya heval Simko bû xwedî hizr û îradeya ku ti hêzek nikare têk bibe, di hemû şert û mercan de dikare berxwedanî bike û serî netewîne. Ev heqîqeta ku rêheval Simko lê digeriya ku bi giyanê fedayî bi dest xist, xuliqandina gelekî xwedî îrade û bi rûmet e ku çok bi hemû pergalên zalim de danî. Weke çiyayê Qendîlê ya tim serbilind mohra xwe li dîrokê dide û bi serbilindî disekine. Em jî têkoşîna xwe heta bi serketina tevahî gelê me em ê zêdetir ji her demê bi ruh û îradeya ku şehîdên wek rêheval Simko, Rêzan, Rênas, Hewram, Rojda, Zîlan, Kawenda, Adil, Rêwan, Rûken, Cengawer, Leşker û Birûsk û bi sedan şehîdên fedayî yên rêya azadî û heqîqetparêziyê ya Rojhilatê Kurdistanê fêrî me kirine, em ê her tim li ser wê rêbaza pîroz bidomînin û bênavber têbikoşin.
Bi wesîleya salvegera şehîdbûna fermandarê neteweyî Rêheval Simko bang li jin û ciwanên Rojhilatê Kurdistanê dikin ku çawa rêheval Simko sala 1999’an li hemberî komploya navnetewî ya li ser Rêber Apo tevlê nav refên gerîla bû û tevlî vê şoreşa ku Rêber Apo pêşxistî bû û heta nefesa xwe ya dawî bi lehengî têkoşiya û li hemberî hemû zalim û dagirkerên her çar beşên Kurdistanê têkoşiya, hûn jî werin tevlê nava refên gerîla bin. Em bi hevre hemû komployên ku heta roja îro bi serkêşiya dewletên Tirk û Îranê yên dagirker bi rê ve dibin pûç bikin û bi hatina sala 100’emîn a Peymana Lozanê ku gel û welatê me kirin qurbanê dagirkeran û em parçe parçe kirin; îro bi têkoşîna bê navber a Rêber Apo û gerîla ku li her çar beşan bi rê ve diçe û roj bi roj nêzîkê serketinê dibe, hûn jî werin xwedî li wê îradeya polayî ya Serok û gerîla derkevin. Dema wê hatiye ku gelê Kurd û gelên bindest ên herêmê bigihîjin azadiya xwe û em Kurd jî weke hemû gelên din ên cîhanê xwedî hizr û îradeya serbixweyî ya xwe bin û li Kurdistaneke azad bi Serokatiyeke azad bijîn û ji koletî û bindestiyê rizgar dibîn.”
