STENBOL – Endamê Meclisa Ciwanan a HDP’ê Îkram Dogan diyar kir ku ji aliyê kesên ku xwe wek endamên MîT’ê dane nasîn ve hatiye revandin û wiha got: “Min birin deverek daristan. Îşkence li min kirin û xwestin min bi pereyan bişînin çiya.”
Endamê Meclisa Ciwanan a HDP’ê Îkram Dogan di 29’ê Hezîranê de li navçeya Kadikoy a Stenbolê ji aliyê kesên nasnameya wan ne diyar ve hatibû revandin. Dogan diyar kir ku kesên wî revandine birine devereke daristan û angaşt kir ku beriyaa bûyera revandinê her tim ji aliyê polisan ve hatiye şopandin. Dogan da zanîn ku kesên wî revandine xwe wek endamên Rêxistina Îstixbaratê ya Neteweyî (MÎT) dane nasîn û wiha got: “Di 29’ê Hezîranê de min li ser rê girtin û bi awayekî lez û bez kirin wesayîtê. Dijun li min kirin, nêzî saetekî min bi wesayîtê birin qeraxê berê û amûrên min tiştên li ser min girtin. Li virê jî min wesayîteke bi modela transporter siwar kirin û gotin ku dewletê ji bo min vê wesayîta taybet şandiye. Ji min re gotin ku endamên MÎT’ê û min bi endamtiya PKK û KCK’ê sûcdar kirin. Angaşt kirin ku min perwerde dîtiye û ji rêxistinê re endaman kom dikin. Ez nizanim min ji ber çi girtin. Gotin ku tu her roj têyî şopandin û her tiştî dizanin. Min ji wan re got ku ez welatiyekî di HDP’ê de dixebitim.”
‘ÎŞKENCE KIRIN’
Dogan destnîşan kir ku wêneyên wî yên li ber standa HDP’ê nîşanî wî dane û îşkence lê kirine û ev tişt anî ziman: “Xebatên min ên HDP’ê weke karekî dij qanûnî kişandibûn. Her tim pirsa kesan ji min dikirin. Ji min re gotin, ‘Em ji te re kar bibînin bixebite’ min jî ji wan re got ku niha karê min heye û ez dixebitim. Li ser vê yekê min birin devereke daristan û li min dan û gefa kuştinbê min xwarin. Gotin gelek kesî li vî daristanî kuştine.”
‘EM TE BIŞÎNIN’
Di berdewamê de Dogan anî ziman ku tûrnûvaya ku Meclisa Ciwanan a HDP’ê li dar xistiye jê pirsîne û ev tişt got: “Ev pirs li min kirin; Hûn çima tûrnûvayê li dar dixin? Armanca we çî ye? Hûn van ciwanan bi rêxistin dikin û dişînin çiya? Çi karê te li te Stenbolê heye? Em te bişînin çiya, çiqas pere dixwazî em bidine te? Min ev yek qebûl nekir û ji ber vê yekê min bi erdê ve kişandin û kirin binî wesayîtê. Ji ber ku min bersiva pirsên wan bi nizanimê bersivand bi kulma li min dan. Paşê qayîşa min vekirin. Min ji wan re got ku tişta hûn dikin bêehlaqî ye.”
BI RAPORA LÊDANÊ SERÎ LI ÎHD’Ê DA
Dogan destnîşan kir ku bi rapora lêdanê serî li ÎHD’ê daye û axaftina xwe bi van gotinan bi dawî kir: “Bi israr dixwestin ez ji Stenbolê biçim û ji bo vê yekê ji min re gotin, ‘Em bileta te bibirin ji Stenbolê biçe’. Min vê qebûl nekir û ji wan re got ku ez li Stenbolê dixebitim û nikarim biçim tu deverê. Paşê jî min birin îskeleyekî. Kincin min di nav xwelî û dûmanê de mabûn. Dema ji wesayîtê pêya bûm ferq kir ku wesayît bê pîlaqe ye. Ji îskeleyê nediçûn. Derûniya min xera bûbû, min nizabû ku çibikim. Çûm Yalovayê û di nav saetekê de careke din vegeriyam Stenbolê û çûm nexweşxaneyê rapora lêdanê girt û paşê jî serî li ÎHD’ê da.”
