AMED – Di 20’ê hezîrana 2017’an de li nezî gundê Fîsê yê navbera Licê û Amedê maşîna zirxi ya kobra ya cendirmeyan li maşîna sivîl qeliband û 5 welatiyên sivîl eciqand û kuştibû. Maşîneya zirxî texsî perçiqandibû û di encamê de Mahmut Oner (74), Mevlut Dagtaş (64), Abdulhamît Dagtaş (63), Fîkrî Demîrbaş (53) û dayika wî Zeynep Demîrbaş jiyana xwe ji dest dabûn. 5 polîsên tîmên taybet ên di maşîneya zirxî de jî bi sivîkî birîndar bûbûn.
Serdozgeriya Komarê ya Licê di çarçoveya lêpirsîna bûyerê de her çiqas polîsê ajokar N.Î. binçav kiribû jî, lê bi şertê kontrola edlî berdabû. Parêzerên mexdûran li dijî biryara lêpirsînê îtîraz kiribû. Parêzeran diyar kiribû ku maşîneya zirxî ji ser xeta xwe derketiye û li otomobîlê qelibiye. Parêzer çûn cihê bûyerê delîlên berhev kiribûn û dîmenên kişandin ji bo wek delîl bê qebûlkirin li Dadgeha Hiqûqê Asliye ya Licê doza tespîtkirina delîl vekir. Dadgehê daxwaza parêzeran di cih de dît û biryar dabû ku ev belgeyên parêzeran wek delîl bê nîşandan. Cendermeyan têkildarî bûyerê “girteka tespîta qezayê” amade kir, ajokarê obomobîlê Fîkrî Demîrbaş “biqisûrê yekemîn” dît û ajokarê maşîneya zirxî polîs N.Î. jî ji ber xiza zêde “biqisûrê duyem” dîtibû. Parêzerên mexdûran diyar kiribûn ku girteka cendermeyan amade kiriye li dijî rastiyê û di çarçoveya beyanên polîsan de hatiye amadekirin û li dijî raporê îtîrazî Serdozgeriya Komarê ya Licê kiribûn. Dozgeriyê rapora cendermeyan a der barê qezayê de amade kiribû, şand Serokatiya Koma Daîreya Îhtîsas a Trafîka Enqereyê ya Saziya Tiba Edlî (ATK). Heyeta ji 3 kesên pispor a ji Serokatiya Koma Daîreya Îhtîsas, profesorek û endezyarek pêk dihat, raporek ji du rûpelan pêk dihat amade kir. Heyetê îdia kir ku tevahiya dosyeyê lêkolîn kirine û ew jî tev li îdiayên di raporê de hatine amade kirin dibin. Heyeta ATK’ê ajokarê maşîneya zirxî N.Î. “bêqisûr” dît û ajokarê otomobîlê Fîkrî Demîrbaş jî “biqisûr” dît. Piştî lêpirsînê Wezîrê Karên Hundir bi hinceta maşîna cendirmeyan zerar dîtiye ji ajokarê sivîl tazmînat xwestibû. Wezaretê ji ajokarê maşîna sivil Fîkrî Demîrtaş (53) ku gel rêwiyê maşîneyê Mahmut Oner (74), Mevlut Dagtaş (64), Abdulhamit Dagtaş (63) û dayika ajokar Zeynep Demirbaş (76) jiyana xwe ji dest dan tazmînat xwestibû. Wezaretê ji varîsê Fikrî Demirtaş, bi sedema maşina cendirmeyan zerar dîtiye xwest 250 hezar Euro tasminat bide. Dozger piştî lêpirsîne rapora Saziya Tipa Edlî (ATK) ya der barê bûyerê de ku ajokar Fikri Demirbaş bi qisûr dîtiye esas girt û der barê lêpirsînê de biryara bêşopandinê da.
PARÊZERAN BIRYAR ÎTÎRAZ KIR
Parêzera xizmên Mevlut Dagtaş ê di qezayê de jiyana xwe ji dest daye Hatice Demir û parêzerên din, piştî Dozgeriyê der barê bûyerê de biryara bêşopandinê da, li Dadgeha Ceza ya Sulhê îtiraz kirin. Demîr, di daxwaznameya îtîrazê de diyar kir ku rapora ATK’ê tenê li ser tespîta qezayê hatiye amadekirin û ji rastiyên delîlên di dosyayê de û wêneyên ku yekîneyên cihê bûyerê amade kirne dûr e. Demîr, da zanîn ku wekî parêzerê mexdûr dixwazin delîlên ku wan kom kirine û xistine dosyayê jî esas bên girtin û li gorî wêne û vîdeoyên cihê bûyerê, bûyer ne li gorî rapora ATK’ê ye.
Demir, xwest ji bo lêpirsînek bi bandor bê kirin divê ji nûve li cihê bûyerê keşîf bê kirin. û qeydên kamera yên maşîna zirxî ya plakeya wê 72 A 0428 dîsa bên parastin û lêkolînkirin. Demîr xwest der barê polîs N. İ. de jî doza cemaweriyê bê vekirin.”
