Komîteya Şehîdan a PKK’ê diyar kir, di daxuyaniya doh a li ser îlana şehadeta Abdûrrahîm Yilmaz de ku 25’ê Tîrmeha 1981’ê li Midûriyeta Emniyê ya Aydinê şehîd bû, hin şaşitî hatine kirine.
NAVENDA NÛÇEYAN- Di daxuyaniyê de hate ragihandin, Yilmaz ne li Emniyeta Manîsayê, lê li Midûriyeta Emniyetê ya Aydinê hatiye şehîdxistin.
Daxuyaniya Komîteya Şehîdan a PKK’ê wiha ye:
“Li ser şehadeta hevalê Abdurrahîm yilmaz ku 25’ê Tîrmeha 1981’ê li Midûriyeta Emniyetê ya Aydinê şehîd bû, doh bi navê komîteya me ya şehîdan daxuyaniyek ji raya giştî re hate ragihandin. Ji ber sedemên teknîkî hin kêmasî di daxuyaniyê de hebûn û wêneyê hevalê me nehatibû weşandin. Ji ber van kêmasiyên teknîkî em lêborîna xwe dixwazin û daxuyaniya xwe careke din bi raya giştî re parve dikin.
DAXUYANIYA KOMÎTEYA ŞEHÎDAN A PKK’Ê
Ji bo malbata Ş. Abdurrahîm Yilmaz,
Em di serî de bi navê tevgera PKK’ê silav û rêzên xwe ji we re dişînin. Hevrê Abdurrahîm Yilmaz, beriya niha 37 salan, ango 25.07.1981’ê li Emniyeta Aydinê şehîd bûye. Bi navê tevgerê ji ber derengmayina îlana şehadeta heval Abdurrahîm, em lêborinê dixwazin. Em sersaxî ji malbat xizm û gelê xwe yê welatparêz re dixwazin, soza şopandina riya ku wan vekiriye didin. Em ê heta dilopa dawî ya xwîna xwe şopdarê bîranîn û mîrateya wan a manewî û madî bin.
ŞEHÎD CEWHERA TÊKOŞÎNA ME NE
Weke tê zanîn Tevgera Azadiyê, di nava şert û mercên pir giran de dest bi tekoşînê kir û di nava van şertên pir giran de şehîdên gelek bi nirx sipartin hembêza Kurdistanê. Têkoşîna gelê Kurd bi ked û xwîna van şehîdan gihişte van rojan, ew bûne cewherê ruhê têkoşîna me. Rêber APO ji ber vê yekê, ji bo PKK’ê got, ‘PKK, partiya şehîdan e’. Tevgera me, bi soza dilsoziya ib şehîdan re meşiya û dimeşe. Partiya me, bi hemû nirxên xwe eydê şehîdan û Rêber Apo ye. Em bi vê ronahiya rastiyê dimeşin.
BÛ MÎNAKA RASTIYA APOYÎ
Hevalê Abdurrahîm bi fedekarî û baweriyeke ji pola tevlî nava Tevgera Azadiyê bû û tu carî li hemberî dagirkeran radestî nepejirand. Di nava şertên ku hebûna gelê Kurd dihat nîqaşkirin de weke bawermendekî ku di bin zehmetiyê herî giran de baweriya xwe diparêze, têkoşîna xwe parast. Lewma dagirkeran ew kirin hedef û xwestin vê baweriyê radest bigirin, ji bo vê armaca xwe pêk bînin şehîd Abdurrahîm li Manîsayê destgîr kirin, li emniyetê êşkence lê kirin. Lê belê wî gavek paşde neavêt û heqîqeta welat û Apoyî temsîl kir. Dema ji êşkenceyê encam negirtin, 37 sal berê Ş.Abdurrahîm qetil kirin.
EM LI SER ŞOPA ŞEHÎDAN E
Xwestin bi qetilkirina wî hemû xeyalên wî jî tune bikin. Lê heqîqeta wî mezin bû û bû rasteqîna jiyana gelê bindest. Îro tevger û baweriya ku heval Abdurrahîm di oxira wê de canê xwe daye, bûye kiblegeha gelên bindest hemûyan. Ev pêşketin hemû bi ked û xwîna şehîdên me çêbûn. Em, hevrêyên wan di rêya ku wan vekiriye de, li ser şopa wan dimeşin.
Gel û tevgera me, di nava 37 salên bihurî de ji pêvajoyên gelekî dijwar derbas bû. Gelek cangoriyên gelê me çêbûn. Xeyalên wan cangoriyan mezin bû û gelê me nêzîktirî rojên azad e. Em, hevrêyên van cangoriyan deyndarê wan in. Mixabin di nava van rojên ji agir de têra xwe me bi malbat û xizmên hevrêyên xwe re nekarî têkilî deynin. Helbet di vê de bandora şert û mercan jî hebû. Ev mijareke dilsoj e ji bo me. Em bawer dikin ku hûn ê vê nebesbûnê fêhm bikin û wate bidinê.
Şehîd mîrateyeke giranbuha ji me hemûyan re hiştin û pêwist e em gelê Kurd xwedî li mîrate û têkoşîna şehîdên xwe derkevin û welatekî azad ji nifşên nû re bihêlin. Wesyeta hemû şehîdên me li ser vî esasî ye. Welatekî azad wê ruhê hemû şehîdên me şad bike. Jiyana li ser van esasan jî wê were heman wateyê. Bi wê hizir û baweriyê em careke din sersaxiyê ji bo malbat, xizmê şehîd û gelê xwe re dixwazin. Car din soz û dilsoziya xwe dubare dikin. Em ê li ser şopa şehîdan dewleta dagirker têk bibin. Xeyalên şehîdên xwe pêk bînin.”
NASNAMEYA ŞEHÎD YILMAZ
Li gorî daxuyaniyê nasnameya şehîd Yilmaz wiha ye:
Nasnav: Abdurrahîm yilmaz
Navê dayikê: Fatma
Navê bav: Abdurrahman
Dem û cihê jidayikbûnê: 09.09.1958/ Gundê Gardile – Misric
Dem û cihê şehadetê: 25.07.1981 – Aydin
