REQA – Meclîsa Rêveberiya Xweser a Reqa derbarê êrîşên hikumeta veguhêz a Şamê û berxwedana gelê taxên Şêx Meqsûd û Eşrefiyê yên Helebê daxuyaniyekî da.
Daxuyanî bi vî rengî ye:
“Meclisa Rêveberiya Xweser a Reqa û niştecihên wê bi fikareke kûr rewşa mirovî ya ku bi lez û bez xirab dibe li taxên Şêx Meqsûd û Eşrefiyê yên bajarê Helebê dişopînin. Ev encama dorpêça bêhnteng a ku hatiye ferzkirin û topbaran û pevçûnên berdewam e, ku jiyana sivîlan tehdît dike û êşa wan a rojane girantir dike. Ev bûye sedema mirina sivîlan, bi dehan birîndaran, kêmbûna giran a xwarin û dermanan, û astengkirina berfireh a xizmetên bingehîn ên ku ji bo berdewamiya jiyanê pêwîst in.
Her çend em berxwedana qehremanî û niştecihên her du taxan li hember van binpêkirinên şermîn silav dikin jî, em di vê ceribandina ku wijdanê mirovan diêşîne de hevgirtina xwe ya tevahî bi wan re piştrast dikin. Her wiha em banga xwe ji hemî aliyên peywendîdar, hem li hundir û hem jî li derveyî welêt, nû dikin ku tavilê dorpêça li ser sivîlan rakin, ketina ewle û birêkûpêk a alîkariya mirovî misoger bikin, û her cûre topbaran û hedefgirtina taxên niştecihbûnê rawestînin da ku jiyana mirovên sîvîl biparêzin.
Her wiha em bang li civaka navneteweyî û rêxistinên mirovî dikin ku berpirsiyariyên xwe yên exlaqî û qanûnî yên derbarê rewşa heyî de bigirin ser xwe û tedbîrên lezgîn bigirin da ku dorpêça li ser her du taxan were rakirin û alîkarî û alavên bijîşkî bê asteng ji niştecihan re werin şandin.
Gelê Reqayê ji bo berxwedan û hevgirtina niştecihên Şêx Meqsûd û Eşrefiyê di rûbirûbûna dorpêçê de spasiya xwe ya kûr nîşan dide û hevgirtina xwe bi wan re radigihîne, û tekez dike ku yekîtiya êşên Sûriyeyê helwestek mirovî ya yekgirtî ferz dike, û rûmeta mirovan nayê dorpêçkirin an jî nayê têkbirin.
Di dawiyê de, em piştrast dikin ku dengê mirovahiyê dê ji çekên xayîn û êrîşkaran bilindtir bimîne, û rêzgirtina ji bo hemî civakan û hevgirtina di navbera wan de tenê rêya avakirina aştiyek dadperwer û jiyanek bi rûmet ji bo hemî Sûriyan e.”
