NAVENDA NÛÇEYAN – Piştî banga seferberiyê ya li dijî êrîşên HTŞ-DAIŞ û çeteyên ku ji aliyê dewleta Tirk ve tên piştgirîkirin ên li ser Rojava, ciwanên enternasyonalîst daxuyaniyek weşandin û banga beşdarbûna seferberiyê kirin. Ciwanên şoreşger ên enternasyonalîst ên li Rojava banga hevgirtina navneteweyî kirin û banga beşdarbûna berxwedana li Rojava kirin.
Daxuyanî wiha ye:
Bi êrîşeke berfireh li dijî deverên rizgarkirî yên Bakur û Rojhilatê Sûriyeyê, çeteyên cîhadîst ên rejîma Colanî li dijî Şoreşa Rojava û destkeftiyên wê şerekî tunekirinê dane destpêkirin. Bi rojan e Hêzên Sûriyeya Demokratîk (QSD) û Yekîneyên Parastina Jinan (YPJ) berxwedaneke dijwar nîşan didin û hemû çavkaniyên xwe bikar tînin da ku pêşveçûna cîhadîstan rawestînin. Di demekê de ku dewleta Tirk piştgiriya hewayî dide van çeteyên faşîst, hêzên emperyalîst, di serî de Dewletên Yekbûyî yên Amerîkayê, “çira kesk” ji bo tepeserkirina şoreşê û komkujiyên nû li dijî gelê Kurd vêxistine.
Niha çeteyên cîhadîst li başûrê Koban û Hesekê bi cih bûne. Bêguman heta ku negihîjin armancên xwe an jî bi têkçûneke dawî nejîn, ew ê ranewestin. Şoreşa Rojava ji bo mayîndebûnê şer dike. Lêbelê, gelên Bakur û Rojhilatê Sûriyeyê bi biryar in ku azadiya xwe biparêzin û ger pêwîst be çek jî hildin.
Ji Dêrikê heta Kobanî, ji Qamîşloyê heta Hesekê, di du rojên dawî de bi hezaran ciwan – jin û mêr – banga seferberiya giştî bersivandin û mil bi mil bi hêzên parastinê yên şoreşê re şer dikin. Li her bajar û her gundî yekîneyên parastinê hatine avakirin. Gel bi biryar e ku bê şer metreyek erd jî radestî faşîstan neke.
Weke şoreşgerên enternasyonalîst , em wekî erkê xwe yê dîrokî dibînin ku beşdarî berxwedana gelên Bakur û Rojhilatê Sûriyeyê bibin û bersiva banga seferberiya giştî bidin. Di Şerê Kobanî yê sala 2014an de, bi hezaran ciwan ji çar aliyên Kurdistanê û şoreşgerên enternasyonalîst ji çar aliyên cîhanê derketin rê da ku li kêleka parêzvanên Kobanî bisekinin. Îro, careke din, dem hatiye ku sînorên dijminane derbas bibin û hevgirtina navneteweyî veguherînin pratîkek jiyanî.
Şoreş niha pêwîstiya me bi me heye. Em nikarin deqeyek din jî bisekinin. Niha dem dema tevgerê ye! Em bang li we dikin: Werin Rojava û wekî enternasyonalîst tevlî berxwedanê bibin! Em ê bi hev re şoreşa xwe biparêzin!
Şoreşa Rojava dê bi ser bikeve – faşîzm dê were hilweşandin!
