NAVENDA NÛÇEYAN – Komeleya Lêkolînê ya Aştiyê li bajarê Bonn ê Elmanyayê konferansa navneteweyî ya “Bi hev re şêwedayîna jiyanê: Pêvajoya Çareseriyê û Perspektîfa Siberojê” lidar xist. Bi beşdarbûna akademîsyen, siyasetmedar, lêkolîner û rêxistinên civakî yên sivîl ji bo nîqaşkirina pêvajoya “Aştî û Civaka Demokratîk” konferans destpê kir.
Rêber Apo peyam ji konferansa “Bi hev re şêwedayîna jiyanê: Pêvajoya Çareseriyê û Perspektîfa Siberojê” re şand.
Beşdar û dostên hêja:
Her kesê ku bawer dike pêvajoyeke avakirina civakî û aştiyê ya ku timî ked û biryardariyê dixwaze heye, di vê civînê de kom bûne. Ez we hemûyan silav dikim.
QAD a ku li ser esasê vê armancê xebatan dimeşîne, bi taybetî têkildarî meseleya Kurd ji bo pêkanîna aştiyê û parastina wê, dikeve nava hewldanan, ev yek xwedî girîngiyeke mezin e. Aştî ne tenê ji bo Kurdan, ji bo hemû gelên li herêmê hêvî ye û bi nirx e. Ev hewldan tevkariyeke girîng e ku fêmkirina navbera gelan xurt dike; zemînê civakî ya jiyana bi hev re ya bi rûmet û aştiyê çêdike.
Xebatên wiha divê zemînên bi tendurist ava bike ku nasname, êş û xeyalên pêşerojên cuda di asoyeke aştiyê ya hevpar de lê bicivin. Aştî di heman demê de rewşa lihevkirineke civakî ye ku edalet, wekhevî, azadî û hurmet dayîna hevdû lê sazî dibe.
Îro qonaxa dîrokî ya em têde, wê bandorê li çarenûsa Tirkiye, Rojhilata Navîn û civaka Kurd bike. Dema ku em di nav de, derfeteke welê pêşkêş dike ku ji pêvajoya negatîf derbasbûna pêvajoya veguhertinê ya pozîtîf mimkun dike; şer, jiderve hiştin û bêhiqûqî derbas bibe. Ev derbasbûn ne tenê tercîheke polîtîk e, di heman demê de hewldaneke ku rastiyên dîrokî û gerdûnî neçar dike.
Ji bo aştiya mayînde û çareseriya rast, divê hiqûq jinûve were avakirin û siyaseta demokratîk were sazîkirin, ev yek pêdiviyeke jêneveger e. Ji vî alî ve pir girîng e ku dawî li pêkanînên kêfî were, pîvanên hiqûqa gerdûnî û biryarên saziyên navneteweyî demildest bên bicihanîn.
Ez hêvî dikim ku ev konferans bibe gaveke ku ji bo zêdebûna derfetên aştiyê, kûrbûna rêyên çareseriyê û pêşeroja hevpar a gelan rêyên nû vebike.
Ez her kesê ji bo aştiyê ked dide bi rêzdarî silav dikim, di xebatên we de serketinê dixwazim.
Abdullah Ocalan
Girava Îmraliyê
(Peyama Rêber Apo ji konferansa “Bi hev re şêwedayîna jiyanê” re.)
