EDENE – 1’ê Mijdarê Roja Kobanê ya Cîhanê li Edeneyê bi pêşengiya Partiya DEM’ê bi daxuyaniyek çapemeniyê hate pîrozkirin û piştre 1’ê Mijdarê bi govend gerendin hat pîrozkirin. Gelek sazî, gel û ciwan beşdarî pîrozbahiyê bûn.
Li Edeneyê bi wesîleya 1’ê Mijdarê Roja Kobanê ya Cîhanê pankartên “1’ê Mijdarê Roja Kobanê ya Cîhanê li hemû gelên cîhanê pîroz be” bi dirûşmên “Bijî berxwedana Kobanê” û “Jin Jiyan Azadî” hatin vekirin.
Daxuyaniya çapemeniyê ji aliyê Hevserokê Giştî yê DEM’ê yê Edeneyê Seyfettîn Aydemîr ve hat xwendin:
“1ê Mijdarê, Roja Cîhanê ya Kobanî, li hemû gelên cîhanê yên ku daxwaza aştî, demokrasî, wekhevî û azadiyê dikin pîroz be.
Tam 11 sal berê, li dijî êrîşên DAIŞê yên li ser Kobanî berxwedaneke destanî ya 134 rojan hate meşandin. Bi hevgirtina şoreşgerên ji çar aliyên cîhanê hêzên xwe kirin yek û berxwedana Kobanî bi ser ket. Vê berxwedanê, bi pêşengiya jinan, deriyekî ji bo avakirina jiyaneke demokratîk, ekolojîk û azadiya jinan li ser bingeha felsefeya Jin Jiyan Azadî vekir. Ji bo vê sedemê 1ê Mijdarê ya 2014an wekî “Roja Cîhanê ya Hevgirtina Kobanî” hate ragihandin. Bi vî awayî, berxwedana Kobanî wekî mîrateyek têkoşînê ya hevpar ji bo tevahiya cîhanê di rûpelên ên dîrokê de cihê xwe girtiye.
Îro, di pêvajoya aştî û civaka demokratîk de, bawerî û hêviya gelê me ji bo aştiyê, û têkoşîna ku em bi dehan salan dimeşînin, ji serkeftina li Kobanî hêzê digirin.
Berxwedana Kobanî perdeya tarîtiyê ya ku hêzên monîst û mîlîtarîst dixwazin biafirînin, dişkîne, rêya gelan ronî dike. Ev berxwedan di heman demê de ji bo gelên cîhanê, ji bo hevgirtina enternasyonalîst û ji bo têkoşîna yekgirtî ya jinan jî bûye rêyek.
Bijî Berxwedana Kobanî
“Jin Jiyan Azadî”
Daxuyanî bi govend gerandin û sloganan bi dawî bû.
