HESEKE – Tevgera Ciwanên Demokratîk ên Ermenî bi daxuyaniyekî êrîşên li ser Dêra Mar Elyas a Şamê şermezar kir. Daxuyanî li ber Dêra Katolîk hat dayîn, bi beşdarbûna dehan ciwan û gelê Ermen.
Daxuyanî bi vî rengî ye:
“Daxuyanî ji bo Raya Giştî
Bi xemgîniyeke kûr û şermezarkirineke tund, em êrîşa terorîstî ya tirsonek a ku li dijî Dêra Mar Elyas li taxa Douweila ya Şamê hedef girtiye, bi tund şermezar dikin. Ev êrîşa xayîn li ser cihekî ewle yê îbadetê, ku îbadetvan bi aramî nimêj dikirin, sûcekî nayê bexşandin, li dijî mirovahiyê û ewlehiya olî ye. Ew pîroziya cihên pîroz û mafên civakên Sûrîyeyî, ku bi dehsalan ji ber belaya tundrewiyê êş kişandine, binpê dike.
Em sersaxiyên xwe yên kûr ji malbatên qurbaniyan û birîndaran re diyar dikin, û piştgiriya xwe ji bo civaka Ermenî li Sûriyeyê, ku beşek yekgirtî ya tevna pirçandî ya civaka Sûrîyeyî ye, piştrast dikin.
Êrîş ne tenê kiryareke terorîstî ya yekcarî ye; ew berdewamiya siyasetek e ku hebûna Xiristiyan hedef digire, ku trajediyên dîrokî yên ku ji bîra me ya kolektîf nehatine jêbirin tîne bîra me.
Em, wekî Tevgera Ciwanên Demokratîk a Ermenî daxwaz dikin ku hikûmeta Sûrîyeyê û saziyên navneteweyî yên têkildar lêpirsînek bilez û berfireh vekin, sûcdaran hesab bidin, û parastina li dora cihên îbadetê û taxên niştecîhên kêmneteweyan zêde bikin.
Em her hewldanek ji bo têkbirina hevjiyana aştiyane li Sûriyeyê red dikin, û em piştgiriyê didin hemû hewldanên ku armanca wan parastina cihêrengiya olî û çandî ye wekî şaxek ji hêza neteweyê.
Terorîzm ne tenê kevirên dêran tehdît dike, lê di heman demê de hewl dide ku rehên toleransê yên ku bi hezaran salan li axa vê herêmê geş bûne jî ji holê rake. Em ê bi israr bimînin, ala aştiyê ji nifşekî bo nifşekî din hilgirin.
Wekî tevgereke ciwanan, em piştrast dikin ku ev sûc dê me ji xebata ji bo pêşerojek edalet û rûmetê ji bo hemî Sûriyan dûr nexe, û em ê mafê zarokên xwe yê jiyana bi aştî li ser axa bav û kalên xwe biparêzin.
Tevgera Ciwanên Demokratîk ên Ermenî”
Ciwanên Ermenî li beramberî êrîşên li ser Dêra Mar Elyas a Şamê helwestê xwe anîn ser ziman û diyar kirin ku ew şer naxwazin, lê belê hevgirtin di navbera hemû olan de dixwazin. Her wiha, destnîşan kirin ku ji sûcdaran divê hesap werin xwestin û ji bo vê jî divê hikûmeta Şamê û saziyên mafên mirovan erkê xwe pêk bînin.
