QAMIŞLO – Bi diruşmeya “Ji Rêber Apo re azadî, ji pirsgirêka Kurd re çareserî”, bi hezaran kes tevlî meşa girseyî ya li Qamişloyê bûn, ya ku ji aliyê Însiyatîfa Gel û Însiyatîfa Azadiya Rêber Apo ya Sûriyeyê hat lidarxistin.
Ciwanên ku tevlî meşê bûn helwestê xwe ji bo daxwaza azadiya fîzîkî ya Rêber Apo anîn ser ziman.
Meş ji Çerxerêya Osman Sebrî dest pê kir. Di meşê de şêniyan wêneyên Rêber Apo hildan. Meş li nava kolana giştî ya bajêr geriya. Di meşê de şêniyan diruşmayên silavkirina Rêber Apo weke; “Bi can, bi xwîn, em bi te re ne ey Serok” û “Bê Serok Jiyan Nabe” berz kirin.
Meş li Çerxerêya Şehîd Rûbar a li naverasta bajêr vegerî mîtîngê. Li wir endama Însiyatîfa Gel a ji bo Azadiya Rêber Apo a li Qamişloyê, Şeha Xelîl axivî. Şeha got: “Banga Aştî û Civaka Demokratîk a ku Rêber Apo beriya 120 rojan kiriye, ew misoger klîta çareseriyê li Rojhilata Navîn e û wê ev banbg bibe mertala parastinê ji bo tevahî gel û neteweyan.”
Şeha ji ber mayîna Rêber Apo di girtîgehê de mixabîniya xwe anî ziman û got: “Mixabin xwediyê vê felsefeyê û vê projeyê hîna di girtîgehê de ye û heta niha dewleta Tirk tu bersivê ji bo sedema mayîna wî di girtîgehê de nade.”
Şeha bang li desthilatên Tirkiyeyê kir ku gavên bilez ji bo misogerkirina azadiya fîzîkî ya Rêber Apo biavêjin, rê li ber komîteyên Aştî û Civaka Demokratîk vekin ku karên xwe di hundirê parlamentoya Tirkiyeyê de bikin û got: “Ger Banga Aştî û Civaka Demokratîk bi cih neyê, wê hemû berdêlê bidin.”
