NAVENDA NÛÇEYAN– Tevgera Ciwanên Şoreşger û TekoJIN ji bo azadiya fîzîkî ya Rêber APO li Berlîn û Hambûrgê meşên girseyî lidarxist.
Berlîn
Li paytexta Elmanya Berlînê bi pêşengiya TekoJIN û TCŞ’ê ji bo azadiya Rêber Apo ku zêdetirî 26 sal in li girava Îmraliyê di şert û mercên giran ên tecrîdê de tê girtin, meşek hat lidarxistin.
Kurdistanî û dostên wan ên li qada Alexanderplatzê li hev civiyan, ji bo şehîdên azadiya Kurdistanê deqeyek rêz girtin.
Piştî rêzgirtinê daxuyanî hat dayşn. Di daxuyaniyê hat destnîşankirin ku fikrên Rêber Apo ji bo ciwanên li çar aliyê Kurdistanê û li gelek bajarên cîhanê bûne hêviyeke mezin.
Di daxuyaniya li ser navê TCŞ’ê hat dayîn de wiha hat gotin: “Rêber Apo ji ber ku fikrên ji tankan xurtir afirand li Îmraliyê di bin tecrîdê de tê ragirtin. Rêber Apo civakeke azad, Kurdistana azad, siberojeke azad pêşkêşî me dike.”
Di daxuyaniyê de bertek nîşanî nêzîkatiya Elmanyayê hat dayîn û wiha domand: “Dema ku hûn behsa aştiyê dikin, çekan difiroşin rejîmên şer. Hûn sembolên me qedexe dikin û me sûcdar dikin. Em ê êdî li hemberî vê durûtiyê bêdeng nemînin.”
Her wiha Lorenz A. ê 21 salî ku yekşema borî li Oldenburgê bi guleya polîsan jiyana xwe ji dest da, hat bibîranîn. Ciwanan diyar kirin ku ew ê nehêlin doza Lorenz A. were nixumandin û daxwaza edaletê kirin.
Piştî daxuyaniyê ber bi Brandenburger Tor ve dest bi meşê kirin. Di meşê de dirûşmên “Bijî Serok Apo”, “Jin Jiyan Azadî” û “Bê Serok jiyan nabe” hatin berzkirin.
Hambûrg
Li bajarê Hambûrg ê Almanyayê bi pêşengiya Tevgera Ciwanên Şoreşger (TCŞ) ji bo azadiya fîzîkî ya Rêber Apo mîtîngek hate lidarxistin. Mîtîng bi govendê ciwanan dest pê kir û bi daxuyaniya çapemeniyê ya li ser navê TCŞ’ê dewam kir.
Piştî deqeyeke rêzgirtin ji bo bîranîna Şehîdên Şoreşa Kurdistanê, li ser navê TCŞ’ê Xeyrî Agirî daxuyaniya çapemeniyê xwend.
Hayrî Agirî got, “Rêber APO di 27’ê Sibatê de daxuyaniyek dîrokî da ku bandor li rojeva hemû cîhanê kir. Rêber APO, li gorî rola xwe ya wekî rêber û fîlozof, nîşanî her kesî da ku dema derfet were dayîn, ew dikare aştiyek mayînde bîne.”
Xeyrî Agirî destnîşan kir ku banga Rêber APO bandorek mezin li ser hemû beşên civakê kiriye û got, “Projeya Konfederalîzma Demokratîk, ku bi jiyana azad re hevwate ye, tenê bi azadiya fîzîkî ya Rêber APO dikare pêk were.”
Piştî daxuyaniyê, mîtîng bi şermezarkirina serdegirtina polîsên Alman a li dijî Navenda Civaka Demokratîk a Kurd (DKTM) a Bremenê bi dawî bû.
