HESEKÊ- Tevgera Ciwanên Ermenî û rêxistinên Ermenî bi munasebeta salvegera 110’an a komkujiya Ermeniyan li bajarê Hesekê meşeke bi meşaleyî li dar xist. Endam û rêveberên Meclisa Ermenî ya Leşkerî, sazî û dezgehên Rêveberiya Xweser û gelek kes beşdarî meşê bûn.
Meş ji çerxerêya Geracê ya bajarê Hesekê dest pê kir heya bi dêra Ermenî ya Ortadoks dewam kir.
Di meşê de alên rêxistinên gelê Ermenî hatin bilindkirin û dirûşmeyên “Em Hene, Em ê Hebin û Em ê Pir bin” hatin berzkirin.
Piştî ku girseya meşê gihîşte ber Dêra Ortadoks ya Ermeniyan, ji aliyê Hevseroka Tevgera Ciwanên Ermenî ya Demokratîk Losnak Kaforyan ve daxuyaniyeke hat xwendin.
Di daxuyaniyê de hate diyarkirin ku ew ne tenê ji bo bîranîna qurbaniyên komkujiyê, lê di heman demê de ji bo nûkirina peymana rûmetê derketine holê.
Di berdewamiya daxuyaniyê de wiha hat gotin: “Li pêşiya cîhanê, li pêşberî Neteweyên Yekbûyî û li pêş wan ên ku hewl didin rastiyan veşêrin: Jenosîdê ji bîr neke û Ermenistana Rojavayî ne bîranîn e, ew welatê li bendê ye.
Em ji mîrata împaratoriya Osmanî re dibêjin: Hûn zarokên xwe di şûr de digirin, û em wêneyên xwe li ser dîwarên rûmet û herheyî vedişêrin. We dixwest ku em wenda bibin, me şoreş hilbijart. Hûn terorê diçînin, em azadiyê diçînin.
Ji vir û pê ve ji dilê meşê em radigihînin: Bîranîn çek e û em wê bi lehengî hilgirin. Ermenîstana Rojava mafek e û em ê vegerînin. Jinên me ne yên ku digirîn, fenerên ku rê nîşan didin in. Xelkê me ne mirine… Lê li benda dema vegerê ne. Bijî Ermenîstan, bijî gelên xwecihî. Yên ku hê jî li ser bêdengiya me behîs dikin bila bilerizin. Em li vir in… û heta serkeftinê em ê li vir bimînin. Rêz ji şehîdan re, silav ji Hesekê heta Efrînê, silav ji berxwedana Bendava Tişrînê re.”
