REQA- KOBANÊ- Yekîtiya Jinên Ciwan ên Bakur û Rojhilatê Sûriyê di çarçoveya Pêngava ‘Ji Bo Azadiyê Dem Dema Pêşengtiyê ye’ de li gelek herêman bi dirûşmeya “Bi Eşq û Slavên Rojê re Xwebûn ” kampên xwebûn ên 3 rojan da destpêkirin.
Bi dehan jinên ciwan beşdarî kampên ku li bajarên Reqa û Kobanê hatin lidarxistin bûn.
Di mufredata kampê ya 3 rojan de gelek çalakiyên bîrdozî, hunerî û werzîşî hatin lidarxistin. Her wiha jinên ciwan li ser gelek mijaran komxebat û nîqaş li dar xistin.
Di roja yekem a kampê de di bin sernavê mijara “Çi hat serê Xwedawendan?” de hatin cem hev. Li vir armanc ew e ku hestên welatparêziyê di jinên ciwan de werin avakirin. Di vê çarçoveyê de jinên ciwan li gelek cihên dîrokî geriyan. Li van cihên dîrokî şopa jinan hat lêgerîn û lêkolînkirin. Her wiha di dersên li ser vê mijarê de 9 katmanên jiyana jinan a di dîrokê de yek bi yek hat nîqaşkirin.
Di roja duyemîn a kampê de jinên ciwan pirsên “Jin kî ye?” Jin çi ye? di bin sernavê mijarê de hatin cem hev. Di saetên destpêkê yên dersê de peyama Rêber APO ya 8’ê Adarê hat xwendin. Piştre her yek ji jinên ciwan peyama Rêber APO bi nameyekê amade kirin û diyarî hevalên xwe kirin.
Di roja sêyemîn û dawî ya kampê de jinên ciwan di bin mijara “Jin Çî Dixwazin” de atolyeyek li dar xistin. Jinên ciwan li ser çawaniya avakirina jiyana azad ji bo pêşeroja xwe nîqaş kirin. Di nîqaşan de ku bal hat kişandin ser avakirina Neteweya Demokratîk, hate destnîşankirin ku divê ciwan û jin pêşengiya xebatên înşayê bikin.
Piştî nîqaşan jinên ciwan kampa xwe ya 3 rojan bi lidarxistina gelek aktiviteyên bi hev re bi dawî kirin
