EDENE- Polîsên dewleta Tirk a dagirker pêşî li ciwanê ku li Edeneyê binçav kiribûn îşkence kirin. Bijîşkên dewleta Tirk ji bo ciwanê ku ji serê xwe û gelek cihên laşê wî birîndar bû, rapora tenduristiyê nenivîsandin û gotin, “Tiştek tune ye”. Ciwan piştî serbest hat berdan ji gelek hejmaran pêşniyarên karkirina bi MÎT’ê re hat û rastî gefan hat.
Ciwanê bi navê Ozcan Dal ê di 13’ê Nîsanê de piştî Festîvala Kulîlka Porteqalî (Adana Portakal Festivali) bi komek ciwan re ji ber ku li gel strana Kurdî govendê digerîne, hate binçavkirin. Ozcan Dal ku piştre birin Saziya Tipa Edlî, şopên lêdanê yên li ser û bedena xwe nîşanî doktorê nobedar da. Lê belê doktorê nobedar got ‘tiştek tune ye’ û di belgeyan de nenivîsî. Özcan Dal ê ku bi navgîniya 5 saetên binçavkirinê de ma piştre hat berdan; Piştî ku Ozcan Dal ji qereqolê derket, jimareke nenas bi rêya WhatsAppê jê xwest ku hevdîtinê bikin. Özcan Dal ev daxwaz red kir.
Ozcan Dal ku bi helwesta xwe ya tund polîtîkayên ajantiyê yên dewleta Tirk têk bir, ev tişt anî ziman:
“Ez ji malbateke welatparêz im û ji Edeneyê me, bi polîtîkayên ku sîstemê li ser malbat û gelê min dimeşîne mezin bûm.
Armanca min û ciwanên weke min ew e ku di çarçoveya Aştî û Civaka Demokratîk de xwe birêxistinkirin û rêxistinkirin e. Armanca me ew e ku em çand û kevneşopiyên xwe bijîn û biparêzin û wek Kurdên bi rûmet bijîn. Em ê li hemberî van polîtîkayên şerê taybet serî netewînin. Ti ciwanên Kurd wê serî netewînin. Berxwedana me wê heta aştî û serkeftina teqez bidome.”
