TÎŞRÎN- Di dema ku dewleta Tirk a dagirker û çeteyên wê ev nêzî mehekê ye êrîşên dijwar li ser Bendava Tişrînê dimeşîne, êrîşên bi balafirên bêmirov metirsiya hilweşîna bendavê zêde dike. Li ser vê bingehê duh danê sibê bi hezaran şêniyên kantonên Firat, Reqa, Tebqa û Cizîrê ji bo parastina bendava Tişrînê ji êrîşan, ber bi bendavê ve ketin rê û di saetên êvarê de gihiştin bendavê û dest bi nobedê kirin.
Endamên Tevgera Ciwanên Şoreşger ên Kobanê yên tevlî nobetê bûn bi daxuyaniyekê diyar kirin ku ji bo parastina Bendava Tişrînê nobetê digirin û heta êrîş neyên rawestandin ew ê bendavê terk nekin.
Di daxuyaniyê de hat gotin, “Duh dema ku me dixwest xwe bigihînin Bendava Tişrînê, dewleta Tirk a dagirker ji bo îradeya ciwanan û gel bişkîne û nehêle em derbasî bendava Tişrînê bibin, êrîşê me kir. Berxwedaneki dîrokî li bendavê Tişrinê hatiye jiyan kirin. Li ser vê bingehê, dema ku me dixwest em ji vir derbas bibin, bi balafirên şer ên herî pêşkeftî êrîşî me kirin, lê tevî her tiştî ne balafirên şer ên herî pêşketî û nejî sîlahê wan ya herî giran dikarin me bidin sekinandin, tevî hemû astengiyan em wek ciwanên Kobanê gihîştin bendava Tişrînê.”
Ciwanan diyar kirin ku heta ku dewleta Tirk a dagirker êrîşên xwe rawestîne ew ê heta dawiyê li bendava Tişrînê li ber xwe bidin û gotin, “Em bang li hemû ciwanên Bakur û Rojhilatê Sûriyeyê dikin; Berê xwe bidin vir. Ev cîhê berxwedaniyê ye. Veya cihê ku em mertala zindî çêbikin da ku em bendavê biparêzin. Divê bendavê de me sedan şehîd daye. Ji ber vê yekê em ê weke ciwanên Kobanê heta nefesa xwe ya dawî li ber xwe bidin. Em bang li hemû ciwanan dikin ku berê xwe bidin vir da ku em li vir berxwedaneke mezin nîşan bidin.”
Daxuyanî bi dirûşma “Bijî Berxwedana QSD’ê” bi dawî bû.
