BEHDÎNAN- Navenda Ragihandin û Çapemeniyê ya HPG’ê di daxuyaniya xwe de ev tişt diyar kirin:
“Dewleta Tirk a mêtinger armanc dike ku Gerîlayên Azadiya Kurdistanê yên ku garantiya siberoja azad a gelê me ye, tasfiye bike û êrîşên xwe yên qirkirinê bigihîne encamê. Li dijî hemû êrîşan têkoşîna me bi ruhê fedayî yê Apoyî li ber xwe dide, hebûna gelê me diparêze û hêviya wê ya siberoja azad zindî dihêle, di meha Şehîdan Gulanê de berxwedana xwe didomîne û bersiva pêwîst dide xayîn û hevkaran. Hêzên me yên ku li dijî hemû êrîşan bedena xwe dikin mertal û şer dikin, her parçeyekî xaka Kurdistanê bi îradeyeke mezin diparêzin.
DAGIRKERAN 286 CARAN ÇEKÊN KÎMYEWÎ, 37 CARAN TEQEMENIYÊN QEDEXEKIRÎ BI KAR ANÎN
Artêşa Tirk a mêtinger û sûcdarê şer a ku nikare li hemberî berxwedana dîrokî ya hêzên me ber bi pêş ve biçe, car din quralên şer ên navneteweyî binpê dike û li dijî tunelên me 286 caran bi çekên kîmyewî û 37 caran jî teqemeniyên qedexekirî bi kar aniye. Ji xeynî vê çeperên me yên şer ên li Herêmên Parastinê yên Medyayê 245 caran bi balafirên şer, 43 caran bi helîkopterên êrîşê û bi hezaran caran jî bi hewan, obus, tank û çekên giran hatine bombebarankirin.
82 ÇALAKÎ HATIN LIDARXISTIN, 43 DAGIRKER HATIN CEZAKIRIN
Gerîlayên Azadiya Kurdistanê xeta berxwedanê ya şehîdên me yên Meha Gulanê bi rengekî herî xurt derbasî pratîkê kir û ji Herêmên Parastinê yên Medyayê heta Bakurê Kurdistanê ji bo rizgarkirina her parçeyekî xaka Kurdistanê îradeyeke bê hempa raber kiriye û tevî şert û mercên herî zehmet bi rengekî bêteredut bi ser dagirkeran de çûye û çalakiyên bi bandor lidar xistine. Gerîlayên Azadiya Kurdistanê li dijî hemû êrîşan rê nade dagirkerkerî û dagirkeran û bi ruhê berxwedan û serketinê ya Şehîdên me yên Meha Gulanê têkoşîna xwe bi rengekî bi bandor meşandiye. Hêzên me di nava vê mehê de; bi giştî 82 çalakî lidar xistin, derbe li dagirkeran xistin. Di encama van çalakiyan de 43 dagirker ceza kirine û 4 dagirker jî birîndar bûne.
YEK BI YEK SÎHA TÊN XISTIN
Gerîlayên Azadiya Kurdistanê pêvajoya pêşxistina serweriya teknîkê û taktîkê, di meha Gulanê de jî pêşde bir û roja 27’ê Gulanê li asîmanên Qendîlê SÎHA ya Aksûngûr a ayîdê artêşa Tirk a dagirker xistiye xwarê. SÎHA’yên ku artêşa Tirk a dagirker û medyaya wê ya şerê taybet bi propagandeyeke mezin qalê dikin, li asîmanên Kurdistanê yek bi yek tên xistin. Artêşa Tirk a dagirker û medyaya wê ya şerê taybet ev rastî ji nedîtî ve hatiye û bi ti rengî îtîraf nekiriye. Ji ber ku ev karakterê durû û derewker ê dewleta Tirk tê zanîn, ji aliyên cuda ve dîmenên SÎHA’yên ku hatine xistin, ji raya giştî re hatiye pêşkêşkirin. Gerîlayên Azadiya Kurdistanê ku navê israra ji bo siberoja azad û jiyana bi rûmet e, weke hêza pêşeng a Şerê Gel ê Şoreşgerî ji bo berpirsyariyên xwe yên dîrokî bi layiqî bi cih bîne, wê xwe ji berdêl dayînê nede paş. Gerîlayên Azadiya Kurdistanê ku mîrateya têkoşînê ya şehîdên me dewr girtiye û mezin bûye, wê teqez bigihije armanca xwe ya ‘Rêbertiya Azad, Kurdistana Azad’.
Bîlançoya şer a têkoşîna meha Gulanê, bi berfirehî wiha ye:
ÊRÎŞÊN ARTÊŞA TIRK
Êrîşên bi balafirên şer; 245
Êrîşa bi helîkoptera êrîşê; 43
Êrîşa bi teqemeniyên qedexekirî; 37
Êrîşa bi dronên bombebarkirî; 61
Êrîşa bi çekên kîmyewî; 286
ÇALAKIYÊN GERÎLA
Bi giştî çalakiyên gerîla yên hatine lidarxistin; 82
WINDAHIYÊN DIJMIN
Hejmara dagirkerên hatine cezakirin; 43
Hejamra dagirkerên birîndar bûne; 4
YÊN HATINE ÎMHAKIRIN
Aksûngûr SÎHA; 1
Sîstema Radarê; 1
Kameraya Mobesse; 10
Kepçe; 3
Dron; 1
Konteynir; 1
Kon; 6
Fotokapan; 7
Çeper; 2
YÊN DERBE LÊ HATINE XISTIN
Hekîkopter; 1
Kepçe; 2
Çeper; 5
Kameraya Mobesse; 1
