NAVENDA NUÇEYAN- Rojnameya jinê ya mehane Newaya Jin hejmara meha Hezîranê gihand ber destê xwendevanên xwe. Mijara ‘xweparastinê’ ku bû manşeta vê mehê ya rojnameyê ji aliyê Halîte Turkoglû, Rûşen Samsat, Heja Zerya, Roza Metîna, Bêrîtan Zagros ve hate nirxandin.
XWERÊVEBERÎ XWEPARASTIN E
Berdevka Meclîsa Jinê ya DEM Partiyê Halîde Turkoglû bal kişand ser têkiliya navbera xwerêveberî û xweparastinê. Turkoglû anî ziman ku jin a xwe dikare bi rê ve dibe, dikare bibe xwedî îrade li dijî êrişên li hemberî xwe dikare hêza têkoşînê bi dest bixe û got, “Bi têgihiştina parastina kolan, tax, çand, ziman, xweza, nan û mafê xwe yê jiyanê dijî.”
TEVNÊN XWEPARASTINÊ
Ji nivîskarên rojnameyê Rûşen Samsat jî ragihand ku Şerê Cîhanê yê 3’yemîn bi esasî li dijî xweza, civak û jinê hate kirin û diyar kir ku li dijî vê yekê parastina xweza, civak û jinê di asta navneteweyî de lawaz, parçebûyî û ji stratejiyê bêpar e. Rûşen Samsat got, “Divê xweparastin weke tevna piştevaniyê ya berfireh a jinê li hemû qadên jiyanê bê belavkirin.”
ZÎLAN Û SEMA HELWESTEK E
Heja Zerya bi wesîleya meha Hezîranê di şexsê Zîlan (Zeynep Kinaci) û Sema Yuce de têkoşîna xweparastinê ya li nava Tevgera Jinên Kurd nirxand.
POLÎTÎKAYÊN ŞERÊ TAYBET
Di rûpelên Kurdî de jî ji nivîskaran Roza Metîna li ser polîtîkayên şerê taybet ên li Kurdistanê bi aktîvîsta TJA’yê Bêrîvan Kûtlû re axivî.
‘LI DIJÎ FERMAN Û QIRKIRINÊ XWE BIPARÊZE’
Bêrîtan Zagros xweparastina li Şengalê nirxand. Zagros bal kişand ser kampanya TAJÊ û qala perwerdeyên xweparastinê yên jinên Şengalî kir ku bi navê ‘Li dijî ferman û qirkirinê xwe biparêze’ têne lidarxistin.
LI ÎRAN Û ROJHILAT GUHERTIN DI DESTÊ JINÊ DE YE
Rûken Nexede mirina Reîsî û hilweşîna netewe dewletê ya li Îranê nirxand û destnîşan kir ku li Îranê û Rojhilat guhertin di destê jinê de ye ku aktora şoreşa ‘Jin, Jiyan, Azadî’ ye.
NAVÊ AKARSEL LI ‘MALA XWENDINÊ’ TÊ BÎRANÎN
Ji nivîskarên rojnameyê Şervîn Nûdem qala karên ‘Mala Xwendinê’ kir ku bi navê endama Akademiya Jineolojiyê Nagîhan Akarsel hate vekirin, ku Akarsel li Silêmaniyeyê hate qetilkirin.
NE ROJA EKOLOJIYÊ, LÊ JIYANA EKOLOJÎK
Di rûpela Ekolojiyê ya bi Kurdî de Dengîr Guneş bal kişand ser 5’ê Hezîranê ‘Roja Hawirdorê ya Cîhanê’ û bi tespîta ‘Ne roja ekolojiyê, lê jiyana ekolojîk’ ragihand ku têkoşîna ekolojiyê bi rojekê nabe.
JI KOLOMBIYAYÊ MÎNAKA TÊKOŞÎNÊ
Newaya Jin di rûpela cîhanê de hevpeyvîneke taybet weşand. Ji jinên reş ên li Kolombiyayê li dijî şer, nijadperestî û baviksalariyê têkoşiya Sheira Gomez qala rola jinan a li nava Konseya Civakan kir ku bi rengekî xweser xwe bi rêxistin dikin.
PROJEYEKE JINÊ YA KOLEKTÎF
Di rûpela çandê de Nîlay Egelî bi rêvebera Komeleya Aryen Hunerê muzîsyen Fadîme Polat re hevpeyvîn li ser projeya ‘Ji Çaran Çar, Jin, Huner’ kir ku meha Kanûnê ya derbasbûyî li Wanê destpê kir û salekê dewam dike.
PÊŞENGÊN TEVGERÊN JINÊ YÊN ELMAN Û GREK
Di rûpelên portreyê yên rojnameyê de di Kurdî de Berjîn Têkoşer li ser yek ji pêşengên tevgera jinê ya Elman Loise Otto, di beşa Tirkî de jî Fîdan Yildirim li ser damezrînera rojnameya destpêkê ya jinê ya li Yewnanistanê Kalliroi Parren gotar amade kirin.
Hejmara meha Hezîranê ya Newaya Jin li ser malpera newayajin.net dikare bê peydakirin.
