PARIS – ”Ronahî – Navenda Ciwanan a Têkiliyên Giştî” û tora ”Youth writing history (Ciwanên Dîroka Nivîsandina Ciwanan)” banga tevlîbûna konferansa enternasyonalîst a Ciwanên Cîhanê ji 3 heta 5’ê Mijdara 2023’an dikin. Konferans wê li bajarê Parîs, Fransa û rêxistinên ciwanan ji çar aliyên cîhanê vedixwîne. Ji ber gelek zehmetiyên ku ciwan li çaraliyê cîhanê rû bi rû ne, ya herî girîng ew e ku wan li hev kom bikin û li ser mijarên hevpar nîqaş bikin.
Ajansa me bi endamê komîteya amadekar a konferansê re wiha axivî:
Konferansa Ciwanên Cîhanê dê cara yekem bi şîara “Azadiyê wek prensîba jiyanê ava bikin” were lidarxistin, Beriya her tiştî armanca vê konferansê çi ye?
Bi vê konferansê re em dixwazin ciwanên têkoşer ên ji têkoşînên cuda yên cîhanê bên cem hev. Di cîhana îroyîn de ku bi şer, qeyran û wêrankirinê tê derbaskirin, divê em berpirsyariya xwe weke hêzeke dînamîk a ku dê di civakê de guhertinan çêbike de bibînin. Ji bo vê jî pir girîng e ku em dijminê xwe baş nas bikin û pergala mêtingeriyê ji kûr ve fêm bikin. Konferans ji bo ku em di vê mijarê de zanyarî û ezmûna xwe parve bikin platformek peyda dike. Em ê bi nûnerên ji çar aliyên cîhanê re têkiliyên demdirêj û torên xurt ava bikin. Ji ber ku pergala wêranker a ku em tê de dijîn gerdûnî ye, divê em di asta navneteweyî de jî xwe bi rêxistin bikin. Ya herî girîng jî konferans derfetê dide ku li dijî pergala kapîtalîst, baviksalarî û jeontokratîk encaman derxînin û dengekî yekgirtî yê ciwanan bê afirandin. Em bi şîara “Azadiyê wek prensîba jiyanê ava bikin” ne tenê dixwazin rewşa heyî analîz bikin û binirxînin, di heman demê de em dixwazin li ser esasê azadiya jin, xweza û civakê pêşerojekê ava bikin. .
Wek kesekî di komîteya amadekar de; Ji bo lidarxistina vê konferansê xebateke çawa tê meşandin? Çend rêxistinên ciwanan di qonaxa amadekariyê de cih digirin? Hûn dikarin li ser vê yekê hin agahiyan bidin?
Ji xeynî mijarên lojîstîk ên ku piraniya dema me digirin (nivîsandina dawetiyan, arîkariya di mijarên vîzeyê de, birêkûpêkkirina rûniştinê,…) piraniya amadekariyan ji bo ragihandin û bihêzkirina ciwanan li çaraliyê cîhanê, vexwendina wan, li ser mijarên konferansê agahdarkirin, derbas dibe. . Amadekirina naverokê jî girîng e, wek mînak me broşurek ku fikrên sereke yên li pişt konferansê vedibêje amade kir û ji hemû beşdaran re şand da ku mirov bikaribe li ser ramanên xwe yên herêmî nîqaş bike. Niha em 17 rêxistin di torê de ne û her yek ji endamên me bi awayekî di pêvajoya amadekariyê de cih digirin. Ji bilî xwendin û nîqaşkirina broşûrê di strukturên xwe yên herêmî de ji bo amadekirina konferansê, rêxistinên din ên di torê de jî bi vîdyoyên tevlîbûyîna konferansê piştgirî dikin ku tê de mirovan vedixwînin beşdarî konferansê bibin.
Di çarçoveya konferansa ku dê di dawiyê de were lidarxistin de banga we ji ciwanên cîhanê re çi ye?
Em bang li ciwanên cîhanê dikin ku îsal beşdarî yekemîn Konferansa Ciwanên Cîhanê bibin û li dijî neheqiyên li vê cîhanê dengê xwe bilind bikin! Li şûna ku em pasîf bin û li benda guhertinan bin, divê em rola xwe ya pêşengên civakê cidî bigirin dest û dest bi nivîsandina dîroka xwe bikin. Loma jî divê em hevdû baştir nas bikin, têkoşîna hev baştir nas bikin û ji nêz ve bi hev re bixebitin. Weke ku Cegerxwîn gotiye: “Eger hûn nebin yek, Hûnê herin yek bi yek”. Ev jî dikare li ser rewşa me ya îro were sepandin. Ger em nikaribin li ser prensîbên hevpar li hev bikin, nikaribin yekîtiya ciwanan ava bikin, em ti carî nikarin li dijî vê pergalê bisekinin. Ji ber vê yekê em bang li Ciwanên Cîhanê dikin ku ji bo avakirina jiyana pêşerojê ya li ser esasê azadiyê hatiye avakirin, bibin yek û tevlî têkoşînê bibin!
