NAVENDA NÛÇEYAN – Endamê Desteya Rêveber a Tevgera Azadiya Civaka Kurdistanê Hawrê Kifrî têkildarî girîngiya azadiya fîzîkî ya Rêberê Gelan Abdullah Ocalan ji bo ciwanan û êrîşên dagirkeriyê yên dewleta Tirk ji ajansa me re axivî.
Hewre Kifrî di axaftina xwe de bal kişand ser êrîşên ku li dijî Başûrê Kurdistanê bi pêş dikevin û di nirxandinên xwe wiha got;
Weke ku tê zanîn dewleta Tirk a faşîst ev demeke dirêj e polîtîkayên qirêj li ser hemû Kurdistanê û Kurdan dimeşîne. Bi taybetî di dema dawî de li ser Başûrê Kurdistanê êrîş û komployên dijwar bi pêş xistine. Qetilkirina şoreşger û welatparêzan jî, ji konsepta dewleta Tirk a faşîst e. Di heman demê de mirov dikare bêje hedefgirtina çand, exlaq û dîroka Başûrê Kurdistanê, ji bo desteserkirina aboriya wê ye.
Em dikarin bibêjin ku ji her alî ve êrîşên dijwar li ser xaka Başurê Kurdistanê heye. Herî dawî nivîskarê wêrek û endamê Desteya Rêveber a Tevgera Azadî Şemal hate qetil kirin. Di heman demê de welatparêzekî me di êrîşa li ser Mexmûrê de hate şehîd xistin. Dîsa di encama bombebarana dewleta Tirk a faşîst ya li ser çiyayên Şarbajarê de jî 2 gerîlayên Rojhilat şehîd bûn.
Hewre Kifrî axaftina xwe wiha domand;
Em dibînin ku êrîş û komployên dewleta Tirk a dagirker li ser Rojavayê Kurdistanê jî dewam dike. Dewleta Tirk a faşîst bê navber êrîşî hemû axa Kurdistanê dike. Gotina ku dibêje ‘Kurdekî reben li Afrîkayê jî be, emê êrîşî wî bikin’ rastiya dewleta Tirk a faşîst radixe berçavan. Ji ber vê yekê di serî de ciwanên Kurdistanê divê em li hemberî van êrîşên dewleta Tirk a faşîst xwedî helwest bin û rola xwe bilîzin. Di hemû têkoşînên şoreşgerî de ya ku rola pêşengtî dileyîzin ciwananin. Dema em li damezrandina PKK’ê jî dinêrin, em dibînin ku yê destpêkê kom ava kirî hemû ciwan bûn. Lewma rola sereke dikeve ser milê ciwanan û divê em li ser vê bingehê rol û misyona xwe pêk bînin.
Li çiya yan jî li bajaran divê em rola xwe bilîzin
Ji ber ku dijmin dixwaze gelê Kurd qir û tune bike. Lê em hemû jî baş dizanin ku wê rêjîma faşîst AKP-MHP’ê, bi xwe di bin van êrîşên qirêj de bimîne û dawî li xwe bîne. Ji bo bi dawîkirina komployên hatine pêşxistin, rihekî fedayî pêwîst dike. Hem li çiya û hem jî li bajaran divê em rola xwe bilîzin. Bêyî ku li ser destê dijmin xwîna me bê rijandin, em weke ciwan bi çalakiyên xwe dikarin civakê bi rêve bibin û êrîşên dijmin vala derbixin.
Weke ku tê zanîn dewleta Tirk a faşîst ev demeke dirêje tecrîda girankirî li ser Rêber Apo dimeşîne. Ev tecrîd îro jî berdewam dike û em dibînin ku ne parêzer ne jî malbat destûr wan nîne ku biçin Rêbertî bibînin. Vê tecrîdê tu nirxek exlaqî û mirovî nehiştiye. Rêxistineke navneteweyî ya ku mafên mirovan diparêze jî weke CPT li hemberî vê yekê bê deng dimîne. Ew jî parçeyek ji vî sûcî ne. Ji ber ku Rêber Apo bi komployeke navneteweyî ketiye nava tecrîdê. Dizanin ku Rêber Apo ji bo Rojhilata Navîn û hemû cîhanê xwediyê projeyeke alternatîf e.
Li Kurdistan û cîhanê ji bo azadiya fîzîkî ya Rêber Apo kampanya hat destpêkirin. Weke ciwan divê em ji bo azadiya fîzîkî ya Rêber Apo erka xwe pêk bînin.
NC// Derwêş Tolhildan
