NAVENDA NÛÇEYAN – Di demên dawî de wêneyên penaberên ji Başurê Kurdistanê yên li ser sînorê Polonyayê hatin kişandin, bêsînor û bêperwa êrîşên rejîma kolonyalîst-qirker a AKP-MHP’ê ya di dijminatiya Kurdan de careke din eşkere kir. Hat zanîn ku ev penaber ji aliyê rejîma AKP-MHP’ê ve ber bi Ewropayê hatine rê kirin.
Tê gotin ku kurdên ji Başûrê Kurdistanê ji Tirkiyeyê bi balafirên tirk derbasî Belarûsê bûne û ev îdia bi belgeyên ku derketine holê jî piştrast dikin. Li vir armanca rejîma AKP-MHP’ê tê fêmkirin û tê dîtin ku penaber çawa ber bi deriyên Ewropayê ve tên sewqkirin.
Li ser vê rewşê me bi ciwanên Başûrê Kurdistanê re jî axivî û nêrînên wan wergirtin. Ciwan di axaftinên xwe de, berî her tiştî bang dikin ku li welat bimînin, xwe xurt bikin û bibin yek û rejîmê têk bibin li welat pêşiya pêkanîna guhertinên ên radîkal vebikin.
Tevahiya hevpeyvîna ku me li ciwanan re kiriye wiha ye:
Weke tê zanîn di salên 1991’an de gel ji aliyê Rêjîma BAIS ve her rastî êrîşan dihat. Bertekê gel û bi taybet jî ciwanan li hember vê yekê bi pêşket. Ji ber bê derfetiyê kar û rewşa aborî gel zehmetiyan dikişîne. Niha jî em dibînin ku bi sedan ciwan û gelê Başûrê Kurdistanê ve li ser sînoran Belarusya û Polanda ve ji welatê xwe hatine koçber kirin û li ser van sînoran daxwaza mafê xwe dikin. Lê li ruxmî vê jî Hikumeta Başûrê Kurdistanê dengê xwe nake. Tam terz dibêje kê ev rewş ecibandiye dikare li vir be û kî qebûl nake dikare biçe, em tenê dikarin ewqas ji we re bikin. Xwe ji her kesî re nîşan didin ku di xizmeta gel de ne lê di rastiyê de li ser gel desthildariya xwe ferz dikin.
Bangawaziya me ya ji bo tevahî gêncan ewe ku dev ji welatê xwe bernedin, divê welatê xwe biparêzin. Hêza ciwanan dikare welat ji destê zalim û hêzên NATO ve rizgar bike. Ji welatê me pîroztir tişt nîne. Em ciwan dikarin bi yekbûna xwe sîstema qirêj biguherînin. Ew rewşeke ku bû 30’î sal berdewam e. Destkeftiyê Başûrê Kurdistanê hemû ji aliyê mala Celal Telabanî û Barazanî ve hatiye desteser kirin. û li ser van berhemê gel ji xwe re jiyaneke xwaş çêkirine. Û xwe li layîqî gel nabînin ku rewşa wan bipirsin. Carek din ji ciwanan re dibêjim ji welatê xwe koçber nebin û em yekbûna xwe ava bikin da ku em va sîstemê tune bikin.
Em dizanin ku piştî salên 1991’an û şûn de gelê herêma Kurdistanê ji ber desthildarî û hikumeta Rêjîma BAIS koçberî welatên derve bûn e. Heman tiştên ku di wê salê de hatine jiyan kirin, îro xwe dûbare dike. Îro jî di sala 2021’an de gelê Başûrê Kurdistanê ji ber Desthilatê herêmê KDP’ê bi hejmareke zêde derketine derveyî welat. Ev jî diyar dike ku malbata Barzanî hemû maf û destkeftiyên gel dagir kiriye û ji xwe re kiriye milk. Li Başûrê Kurdistanê gelê kurd di rewşeke xirab de jiyan dike û desthildar bi xwe di rewşeke baş de jiyan dikin û zarokê xwe jî hemû di cihên taybet û bilind de bi cih kirine. Bi taybet ger rewşa ciwanan xirab dibe qet ne di xema wan de ye, ger em bê xwarin jî bimînin ji bo wan ne girînge, ji bo wan ya girîng rewşa wan û desthildariya wane.
Herî dawî bangawaziya min ji bo ciwanan ewe ku ji welatê xwe hezbikin, ger çidibe bila bibe em dev ji welatê xwe bernedin. Ger em bibin yek em dikarin serkeftinên mezin bi dest bixin. Lê ger em bê hêvî bibin û nebin xwedî îradeyeke mezin emê her ji welatê xwe dûr bikevin. Yekbûna me wê ji me re wlateke azad û xwaser ve bîne.
