KOBANÊ – Komîna Fîlm a Rojava bi dirûşma “Halowîn bi kurdî cuda ye” merasîma cejna Halowîn Kobanê ya Bakur û Rojhilatê Sûriyê li dar xist.
Di merasîma cejnê de Komîna Fîlm a Rojava 9 dîmenên azarên gelê Kurd, ji Efrîn, Kobanê, Amed, Qamişlo, Şengal û Helebçe bi rêbazeke taybet pêşkêş kirin.
Gelek dewletên cîhanê her sal şeva 31’ê Cotmehê cejna Halowînê pîroz dikin. Komîna Fîlm a Rojava li bajarê Kobanê bi çalakiyeke cuda ev cejn li Qada Jina Azad pîroz kir.
GELEK DÎMEN CIHÊ LÊ AZARÊN KURDAN LI HER DERÊ YEK IN
Di dîmenekê de, du jin kelepçekirî li rex hev rûniştine û cilên folklorî yên taybet bi Amedê yên Bakurê Kurdistanê li xwe kirine. Ew jî îşaretê bi siyaseta dewleta Tirk a girtina kurdan dike. Ji ber girtîgehên dewleta Tirk bi kurdên xwedî nêrînên li dijî siyaseta AKP’ê dagirtî ne.
Di dîmeneke din de jî zarokê bi navê Mihemed rûniştiye, li ser laşê wê hûrgiliyên şewatê yên ji ber mayînên fosforê yên dewleta Tirk ên li dijî Serêkaniyê hene.
Li koşeyeke din, jinek tevî zarokan rûniştine û rûyê wan bi xwîn e, li rex wan jî navê Kobanê hatiye nivîsandin. Ew jî îşaretê bi sûcên çeteyên DAIŞ’ê yên li dijî şêniyên Kobanê ku di êrişa 2014-2015’an de dike.
Li aliyekî din jî jineke Efrînî li erdê ye, li rex wê jî çiqilên zeytûnê yên şikestî hene. Ev jî dîmeneke ku zeytûn û şêniyên zeytûnê yên Efrînê azar bi destê komên çete yên girêdayî dewleta Tirk bi zêdetirî du salan dîtine.
Her wiha jineke Şengalî rûniştiye, bi wê re jî azarên jinên êzidî yên bi destê çeteyên DAIŞ’ê di 2014’an de hatiye revandin raber dike. Li aliyekî din jî jineke ciwan li dora wê gel heye, bi dest de qilêş/keleşnîkof û li pêş wê jî zavayê wê yê leşker ê şehîd heye.
Di dîmeneke din de jî mêrek li erdê heye, ew jî îşaretê bi qurbaniyên komkujiya kîmyewî ya ku rejîma Basê ya Iraqê li dijî şêniyên Helebçe ya Başûrê Kurdistanê pêk aniye, dike. Ciwanek rûniştî bi dest de wêneyê jina ciwan bi navê Zozan Şêxo ya ji Qamişlo heye. Zozan Şêxo di teqîna li Qamişlo ya beriya salekê de şehîd bûbû û bi destgirtî bû.
Ciwanekî din jî gîtar bi dest de, kurtikek bi xwîn ku nîşaneya xwînê li ser li xwe kiriye. Ew jî çîroka kurdên ku tenê bi zimanê xwe strane û li tembûrê dane. Mîna ciwanê bi navê Bariş Çakan ê ku li Enqereyê bi destê ciwanên tirk bi kêrê hatiye qetilkirin.
‘HALOWÎN BI KURDÎ RENGEKÎ CUDA YE’
Kesên ev çalakî li dar xistiye, got ku wan xwest ku azarên gelê Kurd ji cîhanê re bi rêya şahiya Halowînê li Kobanê eşkere bikin.
Rêbaza Komîna Fîlm a Rojava pê şahî li dar xistî ji ya cîhanê cudatir e. Amadekarên vê şahiyê da zanîn ku pêwîst e cîhan azarên gelê Kurd bibîne.
Kesên diçin û tên li pêşandana ku saetekê dom kiriye dinêrin. Lê belê kesên beşdarî pêşandanê bûne tevnagerin. Her wiha gelek rojnameger jî amade bûn.
