AMED – Di çarçoveya lêpirsînekê de ku ji Amedê tê birêvebirin, polîsên Tirk avêtin ser malên aktîvîstên Tevgera Jinê ya Azad (TJA) û Komeleya Jinê ya Rosa. Serdegirtin serê sibehê saet di 04:00 de pêk hat û bi saetan li malan lêgerîn kirin.
Li navçeya Karakopru ya Rihayê di sergirtinê de endama damezrîner a Komeleya Jinê ya Rosa Narîn Gezgor, li Amedê jî endama damezrîner a Komeleya Jinê ya Rosa Ayla Akat Ata, Seroka Komeleya Jinê ya Rosa Adalet Kaya û aktîvîsta TJA’yê Gulcîhan Şîmşek û Zelal Bîlgîn, Hevserokê berê yê Partiya Herêman a Demokratîk (DBP) Mehmet Arslan, endama Desteya Rêveberiya Navendî ya HDP’ê Ozlem Gunduz, Hevserokên HDP’ê yên Yenîşehîrê Remziye Sizici û Kasim Kaya, endamê HDP’ê Mehmet Alî Altinkaynak, siyasetmedarê Kurd Celal Yoldaş û Nazîle Tûrsûn hatin binçavkirin.
Narîn Gezgor a li Rihayê hate binaçvkirin piştî kontrolên tenduristiyê wê bibin Midûriyeta Emniyetê ya Amedê.
Tê gotin ku hejmara jinên di operasyonê de tên binçavkirin dibe ku zêde bibe.
