ÎZMÎR – Şaxa ÎHD’ê ya Îzmîrê, rapora ku têkildarî girtîgehên li bajar amade kiribû, bi raya giştî re parve kir. Di raporê de binpêkirinên ku di 4 mehan de li girtîgehan pêk hatine, hatin parvekirin û hat destnîşankirin ku li girtîgehan rêbazên li dijî rûmeta mirovahiyê zede bûne.
Şaxa Komeleya Mafê Mirovan (ÎHD) a Îzmîrê, rapora ku têkildarî binpêkirinên mafan ên ku di mehên dawîn de li girtîgehên li bajar pêk hatibûn, amade kiribû, bi raya giştî re parve kir. îHD’ê heta niha raporên xwe li avahiya xwe bi raya giştî re parve dikir, lê ji ber vîrûsa koronayê vê rapora xwe li ser înternetê parve kir. Rapor, binpêkirinên mafan ên li Girtîgeha Tîpa F a Bûca Kiriklarê, Girtîgehên Hejmarên 1,2,3,4 ên Şakranê, Girtîgeha Jinan a Şakranê, Girtîgeha Zarokan a Îzmîrê, Girtîgeha Tîpa T a Odemîşê û Girtîgeha Tîpa R a Menemenê dihewîne.
ÇAVKANIYÊN RAPORÊ
Rapor, ji aliyê rêveberê şaxa ÎHD’ê Barış Işik ve hat xwendin. Işik, diyar kir ku rapora xwe ji hevdîtinên sazî û komeleyên têkildar, serlêdanên ku ji aliyê malbat û parêzeran ve li komeleyê kirin, serdanên parêzeran ên girtîgehan û nameyên girtiyan amade kirine û bi bîr xist ku li gorî daneyên Wezareta Edaletê li Tirkiyeyê 355 girtîgeh û 282 hezar û 703 girtî hene.
XIZMETA TENDURISTIYÊ NE TÊRKER E
Işik, destnîşan kir ku sererastkirina înfazê cihêkariya di navbera girtiyan de zêde kiriye û wiha got: “Di 4 mehên dawîn de li girtîgehan rêbazên li dijî rûmeta mirovahiyê û tehdekar zêde bûne. Dîsa hejmara girtî û gardiyanên ku testên wan ên vîrûsa koronayê pozîtîf dertên, zêde dibin. Ji ber hejmara zêde ya girtiyan, li girtîgehan ne pêkane ku şertên paqijiyê pêk bên. Ev jî rewşa belavbûna vîrûsê ya li girtîgehan derdixe holê. Li gorî agahiyên ku ji malbat û girtiyan hatine bidestxistin bergiriyên pêwîst li girtîgehan nayên girtin û xizmetên tenduristiyê ne têrker in.”
MAFÊ JIYANÊ PÎROZ E
Di berdewama axaftina xwe de Işik, da zanîn ku mafê jiyanê pîroz û ev tişt anî ziman: “Divê ku pekanînên tecrîdê yên li girtîgehan bên rakirin û pêkanînên memeleya xerab û îşkenceyê bên astengkirin û derbarê berpirsyaran de demildest lêpirsîn bên destpêkirin. Mafên girtiyan ên mîna xwe gihandina tedawiyê, jiyana bi tendurist û xwedîbûna bi tendurist tên astengkirin. Mirina girtiyên nexweş tê temaşekirin. Ne pêkane ku li cihekî ewqas maf bên binpêkirin bê jiyandin. Divê şertên girtîgehan bên başkirin û binpêkirinên mafan ji holê bên rakirin.”
Işik daxwazên xwe wiha rêz kir:
“* Divê serlêdan û gilîkirin bê sînordarkirin bigihîjin cihên pêwîst.
* Divê mekanîzmayên edlî û îdarî, derbarê serlêdan û giliyan de lêpirsîna bi bandor bidine meşandin.
* Divê rêveberiya girtîgehê, derbarê şertên fizîkî û memeleyên ku pêk tên de kontrola edlî û îdarî pêk bîne.
* Divê mafê girtiyan ê têkilî danînê yê bi malbat û cîhanê re neyê astengkirin.
* Divê girtî sewqî cihên nêz ên malbat û parêzerên xwe werin kirin.
* Divê qedexeyên rojname, kovar, radyo, kincan, name û pirtûkan bên terikandin.
* Divê mafê hevdîtin, nivîsandin û parastinê yê bi zimanê zikmakî bê ewlekirin û astengiyên bi kêfî bên rakirin.
* Divê lêgerînên cih û ser mirovan ne li dijî rûmeta mirovahiyê be.
* Divê di cezayên dîsîplînê de sererastkirinê edlî yên li dijî mafên mirovan bên rakirin û nelirêtiyên hiqûqî yên di pratîkê bên derbaskirin.
* Divê îşkence û meleyen xerab ên li dijî girtiyan bên terikandin û li gorî rûmeta mirovahiyê memele bê nîşandan.
* Divê pêşî li kontrolên herêmî û neteweyî û navneteweyî bê vekirin.
* Divê bijîjk û xebatkarên tenduristiyê pewerdeya Protoqola Stenbolê bigirin.
* Dişvê tecrîdên li ser girtiyan bên bidawîkirin.
* Divê sînordarkirinên aktîvîteyên çandî û cişvakî yên li ser girtiyan bên rakirin.
* Divê astengiyên li pêşiya xwe gihandina mafê tenduristî û tedawiyê bên rakirin.
* Divê di pêvajoya vîrûsê de pêşniyarên Rêxistina Tenduristiyê ya Cîhanê (WHO) û sazî û dezgeyên ku têkildarî vê yekê dixebitin li ber çav bê girtin û tevdîr bên girtin û bi rêk û pêk kontrol pêk bên.
* Divê destûr bê dayîn ku saziyên serbixwe yên tenduristiyê bikevin girtîgehan û lêkolînan bikin.”
