SILÊMANÎ/KERKÛK – Ciwanên Welatparêzên Kurdistan, Jinên Ciwanên Têkoşer û Tevgera Ciwanên Şoreşger-Rojava, li gelek deverên Silêmanî û Kerkûkê agir dadan û Newroz pîroz kirin.
Ciwanên Welatparêzên Kurdistan, Jinên Ciwanên Têkoşer û Tevgera Ciwanên Şoreşger-Rojava, Kerkûk û Silêmanî di çarçoveya tedbîrên li hember vîrusa Koronayê li gelek deverên parêzgeha Silêmanî û Kerkûkê bi komên biçûk agir pêxistin û bi coşeke mezin Newroz pîroz kirin.
Silêmanî
Ciwanên Welatparêz û Jinên Ciwanên Têkoşer, bi komeke ciwan û gel re li nêzî Parka Nalîn agirê Newrozê pêxistin. Ciwanan li ber agir govend gerandin û dirûşmên, “Bijî Newroz”, “Bijî Serok Apo” gotin.
Li Taxa Xebat a Silêmanî jî ji aliyê Tevgera Ciwanên Şoreşger-Rojava bi tevlîbûna bi dehan ciwanan, agirê Newrozê hat pêxistin. Ciwanan bi dirûşman govend girtin.
Li Kampa Erbet a gelê Rojava dimîne li çend dewaran ciwanan agirê Newrozê pêxistin. Ciwanan li ber stranên Newrozê govend girtin, alên Rêberê Gelê Kurd Abdullah Ocalan û PKK’ê bilind kirin.
Kerkûk
Ciwanên Welatparêz, li Taxa Rahîmawa ya Kerkûkê bi pêxistina êgir Newroz bi coş pîroz kirin.
