HESEKÊ – Tevî ragihandina agirbestê, lê artêşa dewleta Tirk a dagirker û çeteyên wê binpê dikin. Duh bajarê Serêkaniyê bi çekên giran û balafiran hat hedefgirtin. Ji wê zêdetir jî agirbest weke derfetekê dît, çete û çekên giran derbasî bajêr û gundewarên wê kirin. Li aliyekî din jî balafirên keşfê yên dewleta Tirk li asîmana bajêr digerîn. Çeteyan rêya ku diçe nexweşxaneya bajêr girt, da ku korîdor neyê vekirin û birîndaran neyên derxistin. Li rexê jî di dîmên bombebarana artêşa dewleta Tirk a dagirker de hat eşkerekirin ku mizgefa mezin a Serêkaniyê hat hedefgirtin.
Artêşa dewleta Tirk a dagirker peymana agirbestê derfet dibîne ku çeteyên xwe li sînorê Serêkaniyê zêde dike ku êrîşeke nû li ser herêmê pêk bîne. Ev jî çeteyan bi dîmenên ku hatine belavkirin ku niyeta êrîşkirinê ji herêma Serêkaniyê heta bi Dirbêsiyê heye, hat belgekirin.
Duh jî balafirên dewleta Tirk a dagirker careke din bajarokê Zirganê yê di navbera navçeyên Serêkaniyê û Dirbêsiyê de bombebaran kir.
Weke ku çawa li Efrîn binpêkirinan pêk tînin, çeteyên dewleta Tirk a dagirker heman sûc û binpêkirinan li herêmên Girê Spî û Serêkaniyê yên ku dagirkirine, pêk tînin. Çeteyan 3 bira ji gundê Menxelî yê Girê Spî revandin û ji xizmên wan 12 milyon lîreyên Sûriyê fîdyeya serbestbedanê xwestin. Heta niha jî çarenûsa wan ne diyar e. Bi wê re jî hejmara revandiyan gihaşt 12’an.
Li kampa Holê, Hêzên Ewlekariya Hundirîn hewldana reva hin jinên çeteyên DAIŞ’ê têk bir û 14 ji wan tevî 21 zarokên bi hemwelatiyên cur bi cur, girtin.
235 şehîdên sivîl ji nav wan jî 22 zarok
Hevserokê Desteya Tenduristiyê ya Bakur û Rojhilatê Sûriyê Ciwan Mistefa got, bajarê Serêkaniyê bûye 5 roj in dorpêçkirî ye. Mistefa piştrast kir ku hejmara birîndarên bi êrîşên dewleta Tirk a dagirker li Bakur û Rojhilatê Sûriyê gihaştin 677’an, şehîd jî 235 in û ji wan şehîdan jî 22 zarok in.
Rizgarkirina birîndarên Serêkaniyê
Bi encama israr û berxwedana gelê Bakur û Rojhilatê Sûriyê, tevî xetere û bombebaranên artêşa dewleta Tirk a dagirker û çeteyên wê, duh erebeyên ambulansê xwe gihand nexweşxaneya Serêkaniyê, 30 birîndar û 4 şehîd derxistin.
Beşek ji birîndarên ku ji hêlên Heyva Sor a Kurd, Heyva Sor a Sûriyê û Xaça Sor a Navdewletî ji nexweşxaneya Serêkaniyê hatine derxistin, gihaştin nexweşxaneyên Qamişlo, da ku werin tedawîkirin.
Xebata derxistin, bi saya keda mezin a şêniyên Herêma Cizîrê yên ku bi karwanan û 3 rojan dom kiriye berê xwe dan Serêkaniyê û tevî hedefgirtina ji hêla artêşa dewleta Tirk a dagirker ve, pêk hat.
Hevseroka Heyva Sor a Kurd Cemîle Hemê got, hê jî gelek birîndar û şehîd li Serêkaniyê asê mane.
Daxuyaniya QSD’ê
Fermandariya Giştî ya Hêzên Sûriye Demokratîk(QSD) got, ew li gor peymana ku di navbera Amerîkayê û dewleta Tirk a dagirker de pêk hatiye, tev digerin û her wiha jî bang li Amerîkayê kir ku li gor peymana agirbestê tev bigerin û fişarê li dewleta Tirk a dagirker bikin ku korîdora mirovî vekin ku birîndaran derxin.
Li ser asta Kurdistanê
KCK’ê got, divê agirbesta li Bakur û Rojhilatê Sûriyê hatiye ragihandin ji bo bidawîkirin û vekişîna dagirkeriyê be û ne jî sepandina wê be û piştrast kir ku berxwedêr ji bilî vekişîna bi giştî ya dagirkeriyê tiştekî din, qebûl nakin.
Li ser asta cîhanê
Komek ji parlamenterên Fransayê bang li hikumeta Fransayê û YE’yê kir ku êrîşên Tirkiyê yên li dijî Bakur û Rojhilatê Sûriyê yekser rawestînin û der barê êrîşên wê de endametiya Tirkiyê ya NATO’yê de bisekinîne.
Li aliyekî dîtir jî Eniya Demokratîk a Jinan a Pakistanê piştgiriya xwe bi jinên Kurd ên Rojava yên ku şerê DAIŞ’ê kiriye û têk biriye, kir. Her wiha jî gotin, niha jî şerê hêzên Tirkiyê ku êrîşeke hovane ji 9’ê Cotmehê ve li dijî Bakur û Rojhilatê Sûriyê pêk tîne, dikin.
