BERLÎN- Li paytexta Elmanya Berlînê bi pêşengiya TekoJIN û TCŞ’ê şeva moralê hate lidarxistin û banga meşa dirêj hate kirin.
Şeva di şexsê şehîd Delîl Çiyager û Şehîd Rêzan Amed bi deqîqeyek rêzgirtina ji bo şehîdên Kurdistanê destpê kir. Piştî deqeyeke rêzgirtinê, axaftinan berdewam kir.
Hevserokê Nav-Berlînê Huseyîn Yilmaz axaftinek kir û got, “Di serî de em ji malbatên şehîdan û Rêber APO re bi hezaran silavan dixwazin. Tecrîda li ser Rêber APO didome. Ocalan got, “Eger şert û merc guncav bin, hêza min a teorîk û pratîkî heye ku ez vê pêvajoyê ji zemîna pevçûn û şîdetê derxim zemîneke hiqûqî û siyasî.” Ev têkoşîn ne tenê ji bo Kurdan, ji bo hemû gelên di bin dagirkeriyê de ye. Me weke gel li seranserê Kurdistanê yekîtiya xwe pêk anî. Em vê yekê bi berxwedana Kobanê û niha jî li Tişrînê nîşan didin. Tişrîn her roj tê bombekirin, gelê me li wir li ber xwe dide. Wek hemû mirovan mafê me yê xweparastinê jî heye. Em ê parastina xwe bi xwe pêk bînin. Ji ber vê yekê em li ku bin divê em xwe bi rêxistin bikin û rêxistinbûna xwe bigihînin asta herî jor.”
Endamên TekoJIN û TCŞ’ê banga meşa dirêj a 10’ê Sibatê destpê bike kirin û gotin: “Di çarçoveya pêngava “Ji Rêber APO re Azadî, Ji Pirsgirêka Kurd re Çareserî” de divê em ji bo azadiya fîzîkî ya Rêber APO têbikoşin. Divê em di sala 26. a komploya navneteweyî de nehêlin dagirker bigihêjin armanca xwe. Divê em bi şêwaz, tempo û rêbazên Rêber APO tola komploya 15’ê Sibatê hilînin. Ji ber vê yekê weke ciwanên Kurd em komploya navneteweyî şermezar dikin û ji bo azadiya fîzîkî ya Rêbertiya xwe misoger bikin bang li wan dikin ku bimeşin.”
Bavê Şehîd Rêzan Amed Mele Abdullah Tarhan jî got, “Şehîd Rêzan dema diçû çû cem min û got, “Bavo ez diçim.” Dema diçû van gotinan digot: ‘Ez diçim Kurdistanê, ber bi azadiyê ve. Welatê me di bin dagirkeriyê de ye û ez ji bo azadiya welatê xwe Kurdistanê diçim.” Welatên me yên di bin dagirkeriyê de ne û pergala ku koletiyê li ser me ferz dike ji bo me ji mirinê cudatir nîne.”
Mele Abdullah Tarhan li ser bîranîna şehîd Rêzan wiha got: “Rojekê şehîd Rêzan piştî rûxandina xwaringehekê anîn dadgehê. Dadger pirsî ka çima wisa kiriye. Bi van gotinan bersiv da: ‘Ez naxwazim di bin ala dijminê xwe de bixwim.’ Dema hakim jê pirsî ‘çima?’ wiha bersiv da: ‘Ez biçûk bûm, dijmin her roj bavê min dibirin. Bavê min neçar ma ji welêt derkeve û ez bêbav mam. Rojekê hat diya min jî bir. Ew jî neçar ma welatê xwe biterikîne û ez bê dayîk mam. Me berdêlên giran li hemberî dijmin da. Ji ber vê yekê min nikarîbû li ber xwe bidim.’ Hakim berê xwe da xwediyê xwaringehê û jê pirsî: ‘Ma tu ne Kurd î? Xwediyê xwaringehê got: “Ez Kurd im, lê ez li dewleta xwe najîm.”
Dûvre Mele Abdullah Tarhan wiha axivî: “Divê em bizanibin em kî ne û çi ne. Divê em ji bîr nekin ku em ji ku tên û diçin ku derê.”
Hunermend Bengî Agirî, Hozan Comerd, Koma Serhado û Mîtra berhemên xwe pêşkêş kirin û helbest hatin xwendin.
Şev bi qîrîna dirûşmên “Bijî Serok APO”, “Bijî YPJ-YPG” û “Bijî Gerîla” bi tilîliyên govendê bi dawî bû.
