NAVENDA NÛÇEYAN – Rojnameya Serxwebûnê bi sernivîsa ‘Ji Dihê heta Şengalê, ji Şemzînanê heta Kobanê serfiraziya gerîla’ derket. Di hejmara 484’an de geşedanên siyasî yên li dinya û herêmê, dîroka têkoşîna 38 salan a pêngava gerîla ya 15’ê Tebaxê, berxwedana zindanê, polîtîkaya talan û qetlîamê ya ku dewleta Tirk li ser xwezaya Kurdistanê dike û nivîsên li ser nirxên ku berxwedana gerîla ava kiriye, disekinîne.
Endamê Komîteya Rêvebir a PKK’ê Dûran Kalkan bi nivîsa xwe ya ‘Em bi ruhê 15’ê Tebaxê bibin Egîd û Zîlan û serfiraziyê bi dest bixin’ de dibêje “Desthilatdariya AKP’ê heke wê hilbijartinê bike, divê rewşeke wisa ava bike ku ew karibe bi ser bikeve. Ji ber vê pêdiviya wê bi serkeftineke leşkerî heye yan jî divê ekonomiyê sererast bike û pereyan belav bike. Heke wê hilbijartinê betal bike jî divê rewşeke şer ava bike. Di her alî de ji bo AKP’ê êrîş hewce ye.”
Rêberê Gelan Abdullah Ocalan diyar dike “15’ê Tebaxê di heman salê de bi awayekî dereng, ne zêde jêhatî û bi tarzeke ku bersivê nade amadekariyên me dest pê kiribû. Ji çalakiyê zêdetir wateya wê ya dîrokî û rojane girîng bû. Ji ber vê diyar bû wê mohra xwe li pêvajoyê bixista” û balê dikişîne ser vî tiştî ku dewleta Tirk bi stratejî û taktîkên xwe ne xwediyê wê hêzê bû ku karibe pêşiya pêngavê bigire û artêşa Tirk li hemberî taktîkên gerîla wê neçar be.
Hakî Armanc jî bi nivîsa xwe ya bi sernavê ‘Bi ruhê pêngavê yê 15’ê Tebaxê em ber bi serfiraziyê dimeşin’ diyar dike ruhê 15’ê Tebaxê li hemû gelê Kurdistanê hatiye belavkirin û dibêje “Gerîlayên Kurdistanê û gelê wê, bi ruhê berxwedanê yê Egîd û Zîlanan ber bi serfirazî û azadiyê dimeşe.”
Nedîm Seven jî sala 38’emîn a Pêngava 15’ê Tebaxê dinirxîne û balê dikişîne ser îxanet û komploya li hemberî nirxên ku berxwedana gerîla ava kiriye.
Li ser navê Komîteya Rêvebir a PKK’ê ji bo sempatîzan û kadroyên PKK’ê giştînameyek jî hatiye weşandin û tê de tê gotin “Em bang dikin ku xwe li ser xeta pêngav û serfiraziyêya 15’ê Tebaxê nû bikin, Sala Pêncîyemîn a Rêbertiyê bikin sala serfiraziya herî mezin a dîroka me.”
Endamê Konseya Rêvebir a KCK’ê Mûstafa Karasû bi nivîsa xwe ya bi sernavê ‘Berxwedêriya 14’ê Tîrmehê îro li çiyayên Kurdistanê gihiştiye lûtkeyê’ de dibêje “Şehîdên me bi kêfxweşiya têkneçûnê û coşa wê ber bi şehadetê ve meşiyane. Ji ber ku dizanibûn paradîgmaya Rêber Apo û berxwedêriya 14’ê Tîrmehê wê bi ser bikeve. Kesên îro li ber xwe didin îro jî bi ser ketine, kesên ji bo qirkirina Kurdan şerê qirêj dimeşînin jî ji niha ve têk çûne.”
Endamê Komîteya Rêvebir a PKK’ê Dûran Kalkan jî bi nivîsa xwe ya bi sernavê ‘Modernîteya demokratîk zanista çareseriyê ye’ dibêje “Konfederalîzma demokratîk, pergala siyasî ye. Civaka endustriyel, avadaniya ekonomîk e. Civaka exlaqî û polîtîk tê wateya avadaniya îdeolojîk û civakî ya modernîteya demokratîk. Ev nayê vê wateya ku tu pîvan û qaîde tune. Heke hegemonyaya îdeolojîk tunebe, wê demê exlaq û polîtîka heye. Ji dêvila îdeolojî û felsefeyê pîvan û rêgezên exlaqî û yên polîtîk digirin. Bêyî van tiştan civak pêk nayê.”
Endama Komîteya Navendî ya PKK’ê Dilzar Dîlok di nivîsa xwe ya bi sernavê ‘Têkoşîna ekolojîk îdeolojîk e û divê were globalîze kirin’ de dibêje ‘Heke kesek jiyana xwe ji dest bide, wê ev tişt bandorê li ser malbatekê bike, heke darek bimire ev tişt bandorê li ser civak û hemû zindiyan bike. Wê pêşiya hişkesaliyeke wisa vebe ku bandora xwe li ser hemû civakê bike. Kêzikên li ser pelên daran, pinpinîk, bizin û gelek heywanên din wê têkevin bandora vî tiştî. Divê ev tişt ji dil were hîskirin û wateya jiyanê lê were barkirin, li hemberî qetlîama xwezayê ya li Kurdistanê divê pêngavek were kirin û pêşiya vê qetlîamê were girtin.”
Di hejmara meha Tebaxê de di berga paş de bîranîna bi Kurdî ya Cemşît Serhat jî cih digire.
