NAVENDA NÛÇEYAN – Dîwana Hevserokatiyê ya KCDK-E’yê daxuyaniyeke nivîskî weşand û diyar kir ku wan “Hefteya berxwedan û hêrsa li dijî mêtingeriyê” ragihandine. Dîwana Hevserokatiyê diyar kir ku hefteyekê wê bênavber çalakî bên lidarxistin.
Di daxuyaniyê de hate gotin, “Bi dirûşma ‘Her der Kurdistan, her der berxwedan’ em ê li dijî êrişên topyekûn ên dewleta Tirk, tevahiya hefteyê bi rengekî topyekûn li ber xwe bidin.
Dewleta TC a dijminê Kurdan, mêtinger û qirker ji aliyekî ve dixwaze tevahiya Kurdistanê dagir bike, li aliyê din jî bi rengekî topyekûn êrişê dibe ser nirxên Kurd û Kurdistanê û hewl dide gelê Kurd qir bike. Bi kiryarên faşîst, hovane û barbar ên li devereke din a dinyayê nehatine dîtin, dewleta Tirk a dagirker di qirkirina gelê Kurd de israr dike.
Piştî ku çeteyên DAÎŞ’ê yên barbar ên ku xwedî kir, mezin kir û fînanse kir di dagirkirina Rojava û Başûrê Kurdistanê de bi ser neketin, vê carê artêşa xwe ya dest bi xwîn ji bo pêkanîna armancên xwe yên bi xwîn xiste dewrê.
Dewlet Tirk li Şengal, Mexmûr, Rojava, Başûr û Bakur bi rengekî bê navber êrişên qirkirinê dewam dike. Vê yekê jî bi êrişên fîzîkî û siyasî yên li dijî pîrozmendiyên me, li dijî rûmet, îrade û nirxên me veguherandiye dijminatiyeke topyekûn a li Kurdan û bi rengê ku Kurdan tune bike dimeşîne.
Faşîzma AKP-MHP’ê ku polîtîkayên xwe yên şerê qirêj xistiye dewrê, li her qada jiyanê bi awayekî topyekûn êrişî Kurdan dike. Li pêş çavên tevahiya cîhanê dewleta Tirk a dagirker bi rengekî eşkere li dijî Kurdan qirkirinê dike. Saziyên navneteweyî li pêşberî van êrişên qirker bêdeng û bêhelwest dimînin û bi vî rengî hem cesaretê didin dewleta Tirk hem jî dibin hevparê vî sûcî.
‘DEM HATIYE KU LI HER QADÊ RABIN SER PIYAN’
Li dijî van êrişên qirker ên dewleta Tirk a faşîst, hêza rêxistinbûyî ya gelê Kurd û hêzên demokrasiyê nabe ku qîma xwe bi têkoşîneke ji rêzê bînin. Dem hatiye ku li dijî êrişa topyekûn bi şiyara berxwedana topyekûn rabin ser piyan, li her qada lê ne qiyametê rakin. Çawa ku li DYE’yê li dijî qetilkirina mirovekî bi êrişeke nîjadperestî, bi milyonan mirovî nerazîbûneke mezin nîşan dan, divê em jî bi heman rengî nerazîbûneke bêdawî nîşan bidin û xwe bi rêxistin bikin.”
WÊ TEVAHIYA HEFTEYÊ ÇALAKÎ BÊN LIDARXISTIN
Li gorî daxuyaniyê çalakiyên ku wê tevahiya hefteyê bên lidarxistin wiha ne:
“- Hefteyekê weke hefteya hêrsa li dijî qirkirinê, her roj wê saet di 18:00 de li her qadê çalakî bên lidarxistin. Pêkhate û meclîsên me hemû bi rengekî koordîneyî tevlî plansaziya van çalakiyan bibin.
– Roja Sêşemê bi pêşengiya ciwanan çalakiyên demokratîk û rewa li her qadê bên lidarxistin.
– Roja Çarşemê li pêşiya parlamentan hemûyan wê êrişên qirker û dagirker bên şermezarkirin. Enternasyonalîst û dost tevlî van çalakiyan bibin û dosyayên têkildarî qirkirinê pêşkêşî parlamentan hemûyan bên kirin.
– Rojên Pêncşem û Înê saet di 18:00 de li herêman hemûyan çalakiyên girseyî bên lidarxistin.
– Yekîtiya hêzê ya demokratîk tevî saziyên yekîtiya neteweyî ya Kurdistanê û dostên enternasyonal dawiya hefteyê li hemû welatên Ewropayê, Kanada û Awûstralyayê di asta eyalet û herêman de çalakiyên girseyî pêk werin.
– Roja Çarşemê bi pêşengiya Êzidiyan li Hannover û derdora wê meşek pêk were. Roja Şemiyê bi beşdariya ji Oldenbûrg-Bremenê li Bremenê me û mîtîng bên lidarxistin.”
