NAVENDA NÛÇEYAN – Tevgera Civaka Demokratîk (TEV-DEM) der bar hedefgirtina dewleta Tirk a Şengalê û fermandarên YBŞ’ê de daxuyaniyek weşand.
Daxuyaniya TEV-DEM’ê wiha ye:
“Şer û nakokî li herêmê bi awayekî lezgîn bi pêş dikevin. Her wiha herêm derbasî rewşeke xeternak bû ku bi sedema hesabên siyaseta dewletên dest di Sûriyê werdane, ev jî diyar dibe ku peymanên kûr û veşartî di navbera wan de hene.
Dewleta Tirk a dagirker a ku hêza xwe bi hêzên dewletên koalîsyonê re dipîve û hewl dide sûdê ji hebûna Amerîka û Rûsyayê li herêmê wergire, armanc dike ku xewnên xwe bi pêkanîna kîn û nefreta li hember gelan pêk bîne. Her wiha bi wê re jî bê navber derbeyên asîmanî li dijî hebûna gelê Kurd li her deverê bi hedefgirtina kesayetên fermandar ên nîştimanî yên kurdistanî li pêş çavên civaka navdewletî ku bê deng e, pêk tîne.
Lê belê bila dewleta Tirk baş bizane, êrişên li ser Şengalê vîna me naşikînin, berovajî wê israra me li ser berxwedan û têkoşînê ji her demê zêdetir û bilind dike.
Bi rasthatina ahengên cejna Batîzmê ku civaka êzidî li Rojava û Şengalê pîroz dike, dewleta Tirk derbeyên asîmanî bi firokeyên bêpîlot ku tevahî mîsaqên herêmî û navdewletî binpê kirin, li dijî YBŞ’ê bi awayekî hovane pêk anîn û di encamê de fermandarê giştî yê YBŞ’ê Zerdeşt Şengalî tevî 3 hevrêyên wî şehîd bûn. Ev jî ne cara yekemîn e ku dewleta Tirk li dijî gelê Şengalê van kiryaran pêk tîne.
Dewleta Tirk a dagirker dixwaze nasname û çandên gelên ber bi azadî û jiyana birûmet ve diherikin, qir bike. Her wiha bi plangeriyeke bimetod hewl dide van herêman ji şêniyên wê yên resen vala bike û rewşeke bixof di nava pêkhateyên wê de biçîne û çete û terorîstan tê de bi cih bike. Lê mixabin, hikumeta Iraqê der heqê van kiryarên dewleta Tirk de tevî ku YBŞ’ê parçeyek ji forma leşkerên Iraqê ya itîrafkirî ye û roleke bingehîn di têkbirina DAIŞ’ê li Şengalê de lîst, bê deng e.
Ji lew re divê hikumeta Iraqê helwesteke eşkere der barê van binpêkirinan de bide û şandina wê ya komîteyeke leşkerî da ku cihê bombebarana dewleta Tirkiyê keşf bike, têrê nake û tenê spîkirina rûyê xwe ye.
Em wek TEV-DEM, civaka navdewletî û rêxistinên navdewletî û di serî de jî NY’yê der heqê van sûcên dewleta Tirk ên kuştin, wêrankirin û binpêkirinên li dijî gelên ku parastina maf û pîroziyên xwe dikin, berpirsyar dibînin.”
