MEXMÛR – Li Wargeha şehîd Rustem Cudî ya Mexmurê de di 5. Salvegera fermana Şengalê de ji alîyê Tevgera Jinên Ciwan ya Mexmurê daxuyaniya çapemeniyê hat dayin û piştî daxuyaniyê li ser fermana Şengalê belgefîlmek hat pêşkeşkirin.
Bîranîna salvegera fermanê li Sazîya Malbatên Şehîdan hat li darxistin û ji alîyê jinên ciwan û gel ve eleqeyekê mezin hat nişandan. Bername di şexsê Şehîdên fermanê de ji bo bîranîna tevahî Şehîdên şoreşê deqeyekê rêzgirtinê re destpê kir. Li ser wate û girîngîya rojê endamê Meclîsa Şehîd Axîn Mîzgîn Kara axivî û wiha got: “Em tevahî Şehîdên komkujîya Şengalê bibîrtînin û dibêjin ku wekê jinên Kurd û gelê Kurd em vê roja reş tu caran jîbir nakin û wekê jinên têkoşer em ê hesap ji kujerên Êzîdîyan bixwazin.”
Piştî axaftina Kara ji alîyê Tevgera Jinên Ciwan ya Mexmurê daxuyaniya çapemeniyê hat dayin. Daxuyaniya ku ji alîyê endama Meclîsa Jinên Ciwan Axîn Kajîn Özer ve hate xwendin wiha bû:
“Wekê tê zanîn 3’ê Tebax’a 2014’an de bi hevkarîya dewleta Tirk a dagirker û hêzên emperyalîst bi destê DAIŞ’ê bi awayekê hemdem êrîşên hovane li ser Şengal û Mexmurê hatiye kirin. Di encama erîşên DAIŞ’ê de li wargeha şehîd Rustem Cudî ya Mexmurê de şerekê mezin qewîmîye û nûçegîhana jin Denîz Firat şehîd ketiye. Heman demê wekî ku tê zanîn di komkujî û fermana 74’an de li Şengalê bi hezaran jin hatine revandin, tecawuzkirin, qetilkirin û ji cîh û ware xwe hatin koçber kirin. Bi sedan kes ji tî û birçîna mirin û bi sedan gundên êzidiya hatine wêrankirin. Mi mudaxaleya Tevgera Azadiyê PKK’ê re gerîllayên HPG û YJA- Starê hem li Mexmurê hem Ii Şengalê berxwedaniyekê pir mezin nîşandaye û gel ji destê DAIŞ’ê rizgarkiriye. Di sedsala 21’emîn de jiyankirina komkujiyekê bi vî awayî rureşiya tevahî hêz û dewletên cîhanê ye. Lê mixabin hêzên navdewletî şuna ku pêşî li êrîşên DAIŞ’ê bigrin û berpirsyartiyên xwe bicîh bînin çavê xwe ji van hêzan re girtine û bi awayekê veşartî alîkariya maddî dane van hêzên hovane. PDK ya ku ji ewlehiya Şengalê berpirsyar bu, pişta xwe da gel, berpirsyartiyên xwe pêk ne anîye û reviyaye. Hikumeta Iraqê heta niha jî ji bo vê fermanê lêpîrsînkirinê berpirsyartiyên xwe yên sîyasî û civakî pêk ne aniye. Bê guman sedemê tevahiya van êrîşan tunekirina çanda ezdayetîyê ku çanda herî kevnar a gelê Kurde. Hêzên kapîtalîst ên cîhanê di şexsê komkujîyên jinên êzîdî de jî xwestiye çanda ezdayetîyê ji hole rake û gelê Kurd ji dîroka wê ya resen qut bike. Lê tişta ku dewletên dagirker nexistibu hesabê berxwedaniya jin û civaka êzidî bu. Çawa ku dîrokê de dayê Zeroyan, Zarîfe Osê yan, Sîtî Zeyneban ji bo ku civaka xwe biparêzin xwe fedakirin îro jî şervanên YBŞ û YJŞ ji bo parastina çanda xwe tekoşîn didin. Bi saya fikir û felsefeya Rêbertî civaka Êzidî xwe ji nû ve rêxistin dike û hêza xwe ya parastinê ava dike. Divê tevahî hêzên dagirker bizanibe wekê jin û ciwanên Kurd mîsoger emê hesabê vê komkujiyê û hesabê her jinekê Ezîdî ku hatiye revandin, hatiye qetilkirin bipirsin. Dema em vê pêvajoya dawî dinêrin dibînin ku PDK xeta xwe ya îxanetkar berdewam dike û hîn jî li ser civaka Mexmur û Şengalê polîtîkayên xwe yên qirêj dimeşîne. Dewleta Tirk a dagirker bi alîkariya PDK hem hewayî hem jî bejahî amadekariya erîşên leşkerî dike û alîyê istixbaratî de tevahî agahiyan dide dewleta Tirk a faşîzan. Divê tevahî jin û ciwanên Kurd hemberî kirinên dewleta Tirk a dagirker û duvikên wî hişyarbin, bi awayekî rêxistinî tevbigerin û bi rihê tolhildana şoreşgerî rabin ser piya. Wekê Tevgera Jinên Ciwan ya Mexmur di 5’emîn salvegera fermana Şengalê û erîşa li ser Mexmurê de em tevahî jinên hatine qetilkirin û şervanên ku li ber xwe dane û şehîd ketine bi mînettarî bibîrtînin û soza xwe ya tolhıldanê dûbare dikin.”
Piştî daxuyaniya çapemeniyê derheqê fermana 3’ê Tebaxê ya li Şengalê de belgefîlmek nîv saetê hat nîşandan û bername bi sloganên “Bijî Serok Apo”, “Jin, Jiyan, Azadî” û “Bijî Berxwedana Şengalê hat bidawîkirin.
