AMED – Goristanên HPG û YJA-STAR’yan ên li Gundê Sisê yê Licê gelek caran hatin texrîbkirin. Malbatên ku di roja erîfeyê de çûn ser goristanên zarokên xwe û dîtin ku dîsa goristan hatine texrîpkirin wiha gotin:”Goristanên zarokên me jî têra me dikir lê gorên zarokên me jî nehiştin. Xwedê dijmenekî wiha nede tu kesî.”
Goristanên HPG û YJA-STAR’yan ên li Gundê Sisê yê Licê gelek caran hatin texrîbkirin. Her wiha camî û muzeya derbarê jiyana kesên jiyana xwe ji dest dane hatibû amadekirin di encama bombebaranê hatibûn hilweşandin. Di salên borî de jî konteynir û kevirên goran hatibûn hilweşandin û leşkeran li rêya goristanê hendek kolandibûn. Malbatan li ser vê yekê goristan bi derfetên xwe dîsa çê kiribûn. Îsal jî hat dîtin ku mermer û kevirên goristanan hatin hilweşandin. Malbatên ku bi munasebeta cejnê çûn ser goristanên zarokên xwe bi zehmetî gorên zarokên xwe dîtin. Malbatan bi gotinên “Dewlet ji cenazeyên zarokên me jî ditirsin” bertek nîşan dan.
‘Ji çermê me û ji hestiyên me ditirsin’
Guler Bitkaya ya ku hatibû serdana goristanê wiha got:”Vê carê hîn zêde zirar dane kevirên goran. Gorên zarokên me jî têra me dikir lê gor jî nehiştin. Xwedê dijminê wiha nede tu kesî. Dewlet ji çermê me û ji hestiyên me ditirse. Em wekî malbatên şehîdan dibêjin ku yên ku ev êş kir dilê me heman êş bila bikeve dilê wan jî. Şehîd namirin.”
‘Ewqas hovîtî nabe’
Ji dayikan Nezire Aydin a ku hatibû serdana gorê wiha got:”Me nedixwest em gorên zarokên xwe bi vî rengî bibînin. Bila xwedê heqê me ji yên ku gorên me wiha kirine nehêle. Di her cejnê de wiha texrîb dikin. Ewqas hovîtî nabe. Em ê dîsa kevirên gorê zarokên xwe çê bikin.”
‘Hem me dikujin hem jî me di bin erdê de rehet nahêlin’
Dayika Xatun Aslan jî wiha got:”Ev nefreta çi ye? Hem me dikujin hem jî me di bin erdê de rehet nahêlin. Tew dibêjin em musliman in. Hûn ji kê re mislimantiyê dikin? Hûn diçin camiyan û nimêj dikin. Ji yên wiha mirov nabêje kafir çimkî heqaret dê li kafiran bê kirin. Em wan hewaleyî xwedê dikin.”
