ENQERE-HATAY – Ji rêveberên şoreşgerên tevgerên ciwanên Tirkiyeyê Denîz Gezmîş, Yûsûf Aslan û Huseyîn Înan di di 47’emîn salvegera bidarvekirina xwe de li ser gorên xwe yên li Goristana Karşiyakayê bi merasîmekî hatin bibîranîn.
Di merasîma her sê şoreşgeran de gelek endam û rêveberên rêxistinên ciwanan, partiyên siyasî, rêxistinên civaka sîvîl û bi hezaran mirov amade bûn. Merasîma bîranînê bi deqeyek rêzgirtinê destpê kir û piştre jî Sirûda Enternasyonal hate xwendin. Girseyê bênavber dirûşmên ‘Têkoşîna Yûsûf, Huseyîn û Denîz berdewam dike û dê berdewam bike’, ‘Fîloya 6’emîn a emperyalîstan û hevkaran ji bîr nekin’ û ‘Ciwantî dê were, sosyalîzm dê were’ hatin berzkirin.
Di merasîmê de berdevkê demî yê Platforma Şaxa KESK’ê ya Enqereyê Mevlût Çakmak li ser navê saziyan axivî û wiha got: “Em 47’emîn salvegera qetilkirina Denîz Gezmîş, Yûsûf Aslan û Huseyîn Înan de, carek din di hizûra wan de kom bûn. Cih ji bêhêvî û bedbîniyê re tune ye. Em mecbûrin ku faşîzmê û avakirina rejîma yek zilamtiyê rawestînin û vê dorpêçê bişikînin. Ji bo rêhevalên me soza me heye; em ê hêviyê mezin bikin, cîhaneke bê çîn û bêkedxwarî teqez ava bikin.”
Girseyê piştî daxuyaniyê jî gorên her sê şoreşgeran ziyaret kirin û qurnefîl danîn ser gorên wan.
HATAY
Bi heman boneyê li navçeya Îskenderûn a Hatayê jî bi pêşgiya rêxistina Partiya Kedê (EMEP) her sê şoreşger hatin bibîranîn. Biranîn li avahiya partiyê hat lidarxistin û gelek kes beşdar bûn. Merasîma bîranînê bi deqeyek rêzgirtinê dest pê kir û piştre jî serokê EMEP’ê yê navçeyê Mevlût Bulgur axivî. Bulgur got ku têkoşîn, girêdanbûna wan a bi gel û wêrektiya her sê şoreşgeran dê tu caran neyê jibîrkirin. Bulgur daxuyand ku dê cîhaneke azad û wekhev ava bikin.
