NAVENDA NÛÇEYAN – Endamê Konseya Rêveber a KCK’ê Mûstafa Karasû, di gotara xwe de ya li rojnameya Yenî Ozgur Polîtîkayê bi navê “Têkbirina tecrîdê têkbirina faşîzmê ye” asta heyî ya berxwedana grevên birçîbûnê nirxand û bal kişand ser girîngiya xwedîderketina li vê berxwedanê.
Karasû diyar kir, di berxwedana “Em dawî li tecrîdê bînin, faşîzmê hilweşînin” de berxwedêrên greva birçîbûnê li ber mirinê ne û got, “Di her kêliyê de dibe ku şehadet çêbibe. Yek ji mezintirîn berxwedana fedayî ya dîrokê tê kirin. Leyla Guven, Nasir Yagiz, Îmam Şîş, Fadîle Tok, berxwedêrên li Strasbourgê û girtiyên li zindanan bi biryardariyeke mezin berxwedana xwe didomînin. Berxwedana ‘Hûn nikarin roja me tarî bikin’ niha bi armanca bidawîkirina tecrîdê pêk tê. Bi vê berxwedanê re dinyayê tev dît ku Rêber Apo ji bo gelê Kurd tê çi wateyê. Wateya siyasî a tecrîdê; pêwendiya xwe ya bi têkoşîna azadiyê ya gelê Kurd û demokratîkbûna Tirkiyeyê re baş hatiye fêhmkirin. Vê berxwedanê ji niha ve encamên gelekî mezin afirandiye û weke berxwedaneke serketî cihê xwe di dîrokê de girtiye.”
Karasû bi bîr xist, tecrîdkirina Rêberê Gelan Abdullah Ocalan tecrîdkirineke ji rêzê nîne û diyar kir, ev yek polîtîkayên desthilatdariya heyî ya li Tirkiyeyê diyar dike.
Karasû got, “Rêberê Gelê Kurd, lîderê Tevgera Azadiyê Rêber Apo di navenda pirsgirêka Kurd de cih digire, lewma nêzîkatiya li Rêber Apo tê wateya rewşeke gelekî girîng a polîtîk. Ji ber vê yekê, bi dawîkirina tecrîdê wê rê li ber guhertineke bingehîn a siyasî veke. Nêzîkatiyeke rast a li aktorê bingehîn ê pirsgirêka Kurd, wê ji bo demokratîkbûnê rewşeke nû bide destpêkirin. Ya rast, têkçûna tecrîdê û têkçûna faşîzmê wê bi hev re bibe. Lewma nabe ku têkoşîna li dijî tecrîdê ji rêzê were dîtin. Tecrîd bi têkoşîneke lawaz nayê têkbirin. Ne rast e ku bê xwestin, tecrîd tenê bi berxwedana zindanan ji holê bê rakirin. Eger li dora berxwedana zindanan têkoşîn were dayin, wê hingî tecrîd bi dawî bibe. Lewma berxwedêrên li zindanan timî bang li civakê dikin ku xwedî li berxwedana wan derkeve.”
Endamê Konseya Rêveber a KCK’ê Mûstafa Karasû destnîşan kir, ewladên gelê Kurd nîşanî tevahiya dinyayê dane bê ji bo azadiyê çawa fedayî ne û got, “Cara yekê ye li zindanan berxwedaneke ewqasî berfireh tê kirin. Bêguman li zindanan gelek caran berxwedan hate kirin. Lê belê di vê astê de bi rengê fedayî cara yekemîn e pêk tê. Berxwedana ku sala 2012’an ji bo Rêber Apo hatibû kirin berfireh bû. Lê belê ya niha ji wê jî bilindtir e.”
Karasû diyar kir, têkoşîna li dijî tecrîdê wê êdî hîn bêhtir bikeve rojevê û destnîşan kir, desthilatdariya faşîst a AKP-MHP’ê çiqasî hewl bidin ji nedîtî ve were jî, berxwedan wê zorê bide wan.
Karasû got, berxwedêr ji bo gelê Kurd û mirovahiyê li ber xwe didin û diyar kir, dizanin ku têkbirina tecrîdê wê di têkoşîna azadiyê ya gelê Kurd de rê li ber gaveke girîng veke, lewma jiyana xwe danîne holê.
Karasû destnîşan kir, berxwedana têkbirina tecrîdê pêwendiya xwe bi temamiya civakê heye û got, “Heta ku dawî li vê tecrîdê neyê, tecrîdkirina gelê Kurd jî bi dawî nabe; Kurdistan jî wê her tim weke girtîgeheke vekirî bimîne. Gelê Kurd û hêzên demokrasiyê niha tecrîdkirî ne û di nava şert û mercên zindanê de dimînin. Lewma bidawîkirina tecrîdkirina Rêber Apo pêwendiya xwe yekser bi bidestxistina jiyaneke demokratîk û azad a gel heye.”
Karasû işaret bi şert û mercê giran ên berxwedêrên li zindanan kir û got, “Bi rêk û pêk zext û zilm li wan tê kirin. Ji ber vê yekê gihîştine ber mirinê. Ji bo hurmet û dilsoziya li berxwedêran divê berxwedan li her cihî bê xurtkirin.
Girtî dixwazin berxwedana xwe di pîvanên rojiya mirinê de bidomînin. Ji xwe koma destpêkê ya bêdem-bêdorveger niha li asta rojiya mirinê ne. Di rewşa heyî de ne tenê koma destpêkê, berxwedêrên greva birçîbûnê hemû digihêjin sînorê mirinê. Lewma berxwedan di asteke gelekî krîtîk de ye. Wezîfeyeke dîrokî ye ku her kes bêyî bikeve nava fikarên şexsî li her derê li ber xwe bide.
