Îro Endamên Tevgera Ciwanên Şoreşger a Kobanê û Saziya Malbata Şehîdan li ser serkeftin şervanên Azadiyê li dijî çeteyên DAÎŞ’ê daxuyaniyek dan.
KOBANÊ – Îro Endamên Tevgera Ciwanên Şoreşger a Kobanê û Saziya Malbata Şehîdan li ser serkeftin şervanên Azadiyê li dijî çeteyên DAÎŞ’ê daxuyaniyek dan. Daxuyanî ruxmê baranê û hewaya sar li Goristana Şehîdan a Kobanê bi beşdarbûna sedan kesan pêk hat. Ciwan û malbatên şehîdan di daxuyaniyê de ala YPG, YPJ, ala Tevgera Ciwanên Şoreşger û wêneya Rêberê Gelan Abdullah Ocalan rakirin.
Her wiha di daxuyaniyê de sê şehîdên li Bakurê Kurdistanê çalakiya fedaî pêk anîn hate bîranîn û hate gotin: “Şehîd Zulkuf Gezen, Şehîd Ugûr Şakar û Şehîd Ayten Beçet ku li Bakurê Kurdistanê û Ewrûpa li dijî tecrîda li ser Rêber Apo bedena xwe kirin agir û şehîd ketin bi minnetarî bibîrtinin û soza bilindkirina têkoşinê dubarê dikin.”
Berfirehiya daxuyaniyê wiha ye:
“Di destpêkê de em wek Tevgera Ciwanên Şoreşger a Kobanê serkeftina hêzên QSD, YPG û YPJ li dijî çeteyên DAÎŞ’ê ji Rêberê Gelan Rêber Apo re û hemû gelên herêmê re pîroz dikin. Em bawer dikin ku xilaskirina çeteyên hov û reş wê ji bo cihanê bibe hêviyek mezin a azadiyê. Dîsa em dibînin ku gelê Kurd, Ereb, Suryan û Turkmen bi qedandina çeteyên DAÎŞ’ê gihîştin aramiyekî, tirsa ku dijîn dawî bû.
Bi daxuyaniya Fermandariya QSD’ê em dizanin ku di tunekirina çeteyan li ser axa Rojava û Bakûrê Suriye’yê 11 hezar şehîd ji aliyê gelên herêmê ve hate dayîn. 22 hezar law û keçên van axan di vê oxirê de birîndar ketin. Em Şehîdên Şoreşê û hemû şehîdên ku ji bo azadiya gelan canê xwe dan bi minnet bibîrtînin.
11 hezar Zarokê gelan bêtirs çûn ser çeteyan û tu carî gav paş ve neavêtin. Ji destpêka Berxwedana Kobanê ku çeteyan têkçûna xwe ya yekem li vir jiyan heya berxwedana Dêrezorê fedayiyên azadiyê bi bawer çûn li ser dijmîn û ew qedandin. Ger rojek jî ji vê berxwedanê re navber bihata dayîn wê çete ji vê hêz bigirta, lê şervanên azadiyê bênavber çûn li ser çeteyan û ew tunekirin. Bûn sedem ku li hember Gelê Kurd çok danin. Xeyalên serokçeteya dewleta Tirk Erdogan a ku digot “Kobanê ket û ha ket” vala derxistin.
Em ji vir radigîhinin ku ev serkeftina li dijî çeteyên DAÎŞ’ê bi saya van şehîdên di van goristanan de radizên pêkhatiye. Ev serkeftin serkeftina yên stêrkên van gelan in. Ev serkeftin serkeftina şehîdên ku bûn ronahî û taritî perçe kirin e. Em ê tu carî dilsoziya wan, bawerî û hêviyê wan ji bîr nekin. Şehîdên van axan bûn ronahiya pêşerojê zarokan, bûn fedaiyê jiyana azad.
Pekrewan û lehêngên Gelê Kurd û Gelê Herêmê bûn sedem ku tevahî gelên herêmê werin gel hev û hêviya bi hev re em dikarin jiyan bikin ava kirin. Ev bûn mîsogeriya paradigmaya netewa demokratîk a Rêber Apo. Bi saya van şehîdan êdî tu hêz nikare êrîşê van axan bike. Ev şehîd di heman demê de ji bo me bûn ferman ku em axa Efrînê rizgar bikin.
Em wek Tevgera Ciwanên Şoreşger ên Kobanê ji bajarê Berxwedanê Kobanê carekî din diyar dikin ku em ê xewn û xeyalên Şehîdan pêk bînin. Em ê jî wek wan tu carî gav paş ve navêjin û her cura dijmîn ji van axan biqewîtinin.
Her wiha Şehîd Zûlkûf Gezen, Şehîd Ugûr Şakar û Şehîd Ayten Beçet ku li Bakurê Kurdistanê û Ewrûpa li dijî tecrîda li ser Rêber Apo bedena xwe kirin agir û şehîd ketin bi minnetarî bibîrtinin û soza bilindkirina têkoşinê dubarê dikin.”
Daxuyanî bi dirûşman dawî bû û piştê daxuyaniyê girse bi wesayîtan di nav bajar de geriyan û serkeftina QSD’ê pîroz kirin.
