HBDH’ê diyar kir, Newroz ji nû ve vejîn e, serhildan e û ragihand, “Dem ew dem e ku em bi dest îradeya xwe şer bikin û azad bibin. Ji her demê bêhtir dema têkoşîn û berxwedana hevpar e.”
BEHDÎNAN – Komîteya Rêveber a Tevgera Şoreşger a Yekbûyî ya Gelan (HBDH) bi wesîleya Newrozê daxuyaniyeke nivîskî weşand.
Di daxuyaniyê de hate ragihandin, Newroz ji bo gelên Rojhilata Navîn roja vejîn û serhildanê ye û hate gotin, “Newroz roja berxwedana gelê Kurd a li dijî zaliman e. Mîna doh îro jî Dehaqên zalim û Kawayên hemdem ên li dijî wan li ber xwe didin hene. Dehaqê zalim ê vê serdemê; desthilatdariya faşîst a AKP-MHP’ê ye. Kawayên hemdem jî Leyla Guven û şervanên azadiyê ne.”
Di daxuyaniyê de hate ragihandin, bal kişand ser dijminatiya dewleta Tirk a li dijî gelê Kurd û gelên bindest û hate destnîşankirin, ev polîtîkaya înkar û tinekirina gelê Kurd û qirkirinê ti carî neguheriye.
HBDH’ê diyar kir, dewleta Komara Tirkiyeyê sîstema xwe ya li ser rijandina xwînê ava kiriye, bi israr bi talan û dagirkeriyê didomîne û ji bilî zilm û êşê heta niha tiştek nedaye gelan.
Di daxuyaniyê de hate gotin, “Çawa ku komkujî û qirkirin li ser vê xakê kêm nebûn, berxwedan û serhildana gelan jî ti carî kêm nebûn. Tevî çiya û bajarên welêt, zindanan jî şahidî ji berxwedan û têkoşîna şervanên azadiyê re kirin. Dîrok û kêlî şahidin ku gelên me serê xwe li ber zilmê netewandine. Ew ê netewîne. Desthilatdariya AKP-MHP a faşîst zilma xwe çiqasî mezin bike wê li dijî wê timî şervanên azadiyê derkevin û li ber xwe bidin.”
LEYLA GUVEN ŞEREKÎ MEZIN Ê RÛMETÊ DIDE
Di dewama daxuyaniyê de hate ragihandin, Leyla Guven ku li dijî tecrîd û faşîzmê bedena xwe daniye ber azadiyê, ji berxwedaneke mezin re pêşengiyê dike û hate gotin, “Bi sekna xwe ya bi rûmet ne tenê li dijî tecrîdkirina neheq û bêhiqûqî ya bi salan li lîderê PKK’ê Abdullah Ocalan tê ferzkirin, derdikeve. Di heman demê de ji bo azadiya her kedkarên li azadiyê digerin rabûye ser piyan, li ber xwe dide û weke şervaneke azadiyê bi nasnameya jinên şoreşger pêşengiyê ji têkoşîna azadiya jinan re dike.
Leyla Guven agirê azadiyê yê ji Kawayê hesinkar û pêşengê berxwedana zindana Amedê Mazlûm Dogan wergirtiye, geş dike. Li dijî tecrîdê, birçîbûnê û neheqiyê li ber xwe dide. Şerekî mezin ê îrade û rûmetê dide.
Dîktatorên ku dixwazin gelê me bi birçîbûn û zilmê terbiye bikin, divê baş zanibin ku şervanên azadiyê bi êşê nayên tecrûbekirin. Dîrok bi berxwedana esîl a mirovên li dijî êş û êşkenceyê li ber xwe didin dagirtiye.
Leyla Guven şopdara bi rûmet a Îbrahîm Kaypakkaya, Mazlûm Dogan, Kemal Pîr, Hayrî Dûrmûş û Sakîneyan e ku li zindana Amedê li dijî êş û êşkenceyê li ber xwe dan.”
NEWROZ BERXWEDAN E
Di dewama daxuyaniyê de hate destnîşankirin ku tecrîd ne tenê pirsgirêka zindanan e, pirsgirêka her kesên alîgirê azadî, edalet û kedê ne û hate gotin, “Dem hatiye ku her kes rabin ser piyan, dakevin qadan û kolanan û ji bo azadî û mafê xwe yê bingehîn têbikoşin. Dem ew dem e ku em bi dest îradeya xwe şer bikin û azad bibin. Ji her demê bêhtir dema têkoşîn û berxwedana hevpar e. Dem hatiye ku em bi vê hişmendî û perspektîfê berê xwe bidin azadiyê û dewleta zilm û mêtingeriyê biavêjin ser sergoyê dîrokê.”
