PDK li Parlamentoya Iraqê kete nava hewldanên propagandaya reşkirina hêzên YBŞ/YJŞ û Rêveberiya Xweser a Şengalê. Hate ragihandin, PDK’ê li parlementoyê ji bo mudaxeleya li ser Şengalê jî bi gelek aliyan re jî dicive
NAVENDA NÛÇEYAN – Derket holê ku (PDK) ketiye nava hewldanên planên nû yên li dijî Kurdên Êzidî yên li Şengalê. Her wiha PDK dixwaze vê planê bi rêya Hikûmeta Navendî ya Iraqê bike.
Partiya Demokratî Kurdistan (PDK) piştî ku hêviya wê nema ku qeymeqamê berê yê ser bi PDK’ê Meheme Xelîl û rêveberiya berê ya Şengalê vegere Şengalê, niha jî bi rêya çend parlamenterên partiya xwe hewl dide li Parlementoya Iraqê wisa bikin ku hikûmeta Iraqê li dijî rêveberî û hêzên parastinê ya Şengalê Yekîneyên Berxwedana Şengalê (YBŞ) û Yekîneyên Jinên Şengalê (YJŞ) sor bikin.
Piştî ku DAIŞ’ê 3’yê Tebaxa 2014’an kete herêma Şengalê bi hezaran Hêzên Pêşmerge yên girêdayî PDK’ê Şengal hêlan û reviya bûn. Di êrîşa hovane ya li ser Şengalê de bi hezaran welatiyên sivîl ên bê parastin man ji aliyê çeteyên DAIŞ’ê ve hatin qetilkirin, jin û zarok jî di nav de bi hezaran kesên êzidî jî hatin revandin. Her wiha ji bo civak bi temamî qir nebe, HPG û YJA Star li hewara civaka êzidî çû û bi hezarna kes ji qirkirinê xilaskir.
Li ser vê ji bo careke din ev qetilkirin û qirkirin li ser civaka êzidî neyê kirin xort û keçên Êzidî xwe kirin yek û hêzêke parastinê ya bi navê Yekîneyên Berxwedana Şengal (YBŞ) û Yekîneyên Jinên Şengalê (YJŞ) avakirin. Ji wê rojê heta niha YBŞ û YJŞ herêma Şegalê û gundên derdora wê ji çeteyan paqij kirin û herêm kirin xistin di nava ewlehiyê de. Pişt re ev hêzê ji aliyê hikûmeta Iraqê ve fermî hate naskirin û niha jî parastina Şengalê tevahî dike.
Bi demê re encûmenekî fermî ku ji xelkê Şengalê pêk tê hate avakirin ku rêveberiya bajar û navçeyên Şengalê bike. Dîsa ev rêveberî ji aliyê hikûmeta Iraqê ve bi awayekî fermî hatiye erêkirin. Dîsa berî demekê hikûmeta Iraqê rêveberiya navçeyên Gir Izêr, Sîba Şêx Xidir û çend navçeyên din radestî vê encûmenê kiribû.
Propagandayên reşkirinê
Niha Partiya Demokratî Kurdistan (PDK) ketiye nava hewldan û planên nû ku Yekîneyên Berxwedana Şengal (YBŞ) û Yekîneyên Jinên Şengal (YJŞ) dîsa Rêveberiya Xweser a Şengalê ku ji aliyê Bexda ve fermî hatiye erêkirin, weke hêz û aliyên ne fermî bidin nîşandan, li nava Parlementoya Iraqê popagandaya reşkirinê dane destpêkirin. Bi vê yekê dikin armanc ku li parlementoyê van hêzên weke hêzên nefermî bidin nîşandan û li ser vê yekê biryar bigirin.
YBŞ/YJŞ’ê wekî çete pênase dikin!
Parlementerê PDK’ê yê Parlementoya Iraqê Îxlas Sebah Dilêmî di rûniştina 24 a parlemenê axivî û dijayetiya hêzên Şengalê YBŞ û YJŞ’ê kir. Dilêmî YBŞ û YJŞ bi çete û mafya sûcdar kir û daxwaz ji hikûmeta Iraqê kir ku mudaxele li dijî wan bike. Her wiha Dilêmî ji bo herêmên niha aram ku welatiyên sivîl ên Êzidî lê dijî jî weke herêmên metirsîdar pênase kir.
