Dêrsim Dag; “Coş û hêza ciwanan wê tecrîdê bişkine. Ciwan pêwîstê bi rihê seferbertiyê li tevahî Kurdistan û Tirkiyê biherikin qadan.”
NAVENDA NÛÇEYAN – Parlamentera HDP’ê ya Amedê Dêrsim Dag û 5 HDP’yî din duh bi armanca rakirina tecrîdkirina Rêberê Gelan Abdullah Ocalan dest bi greva biçîbûnê ya bêdawî û bêdorveger kiribûn. Dêrsim Dag got ‘encama çi bibe, wê bi heybet be’ û diyar kir ku ew qet dev ji berxwedanê bernadin û tu hêz nikare ve berxwedanê jî bişkine.
Gelek çalakvanên grevên biçîbûnê gihiştiye qonaxa xeter û wêdetir çûne
Dêrsim Dag diyar kir ku ev 20 salin li ser Rêberê Gelan Abdullah Ocalan tecrîdek heye û ev 4 salên dawî ev tecrîd hatiye girankirin. Ev tecrîd di şexsê Rêberê Gelan Abdullah Ocalan li ser tevahî gelê Kurd, gelê Tirkiye û gelê Rojhilata Navîn tê meşandin. Çalakiya greva birçîbûnê ya Hevseroka Kongreya Civaka Demokratîk (KCD) Leyla Guven ku li dijî tecrîda li ser Rêberê PKK’ê Abdullah Ocalan dabû destpêkirin di roja 117’an de berdewam dike. Dîsa li Kurdistan, Tirkiye û li dervî welat gelek çalakvan gihiştiye qonaxek xeter.
Encama çalakiyan çi bibe wê bi heybet be
Piştî 5 endamên HDP û ez li avahiya HDP ya Amedê ji bo piştgiriya Leyla Guven ketin greva birçîbûnê ya bêdawî û bêdorveger Soylu talîmat da polisên xwe û di saetên evarî de polisan girtin ser avahiya HDP ya Amedê. Her 5 hevalê me bi zordariya polisan ve rû bi rû ma û berevajî hatin çerçoqkirin û ew xistin binçav. Hevalê me di rewşa binçavkirî çalakiya xwe didomine. Ez jî li avahiya HDP’ê ya li Amedê çalakiya xwe didomine. Kes nikare pêşî li ber çalakî û berxwedanê bigre û em qet dev ji çalakiya xwe bernadin heta ku daxwazên me pêk werin. Encam çi bibe wê bi heybet be.
Muxatabê vê tecrîdê ciwan in, ancax ciwan tecrîdê bişkinin
Tecrîda girankirî ya li ser Rêberê Gelan Abdullah Ocalan herî zêde ciwan his dikin. Îro ciwan li ser perspektîfên Birêz Abdullah Ocalan hatiyê vê astê û li ser xeta ku wî xêzkiriye dimeşin. Bi Birêz Abdullah Ocalan re herî zêde girêdayî ciwan in û yê tecrîdê herî zêde his dikin jî ew in. Li ser vî esasî ciwanên Kurd, Tirkiyê û tevahî Rojhilata Navîn yekser muxatabê vê tecrîdê ne û yê vê tecrîdê bişkinin jî ew in.
Ciwan pêwîste bi rihê seferbertiyê dakevin qadan
Em hemû ciwanan vedixwînin vê berxwedanê, pêwîste ciwan li her qadê vê berxwedanê mezintir bike, her curê çalakiyên demokratîk pêk binîn û bibin dengê vê berxwedanê. Ji ber ku em dizanîn hêz û coşa ciwantî dikare vê tecrîdê bişkine, ji ber vê pêwîste ciwan her curên çalakiyên demokratîk pêk binin. Bila ciwan li Kurdistan û tevahî Tirkiye bi rihê seferbertiyê dakevin qadan.
Yên ku vê berxwedanê bigihînin encamê jinên ciwan in
Yên vê berxwedanê da destpê kirin jin bû, li ser vî esasî rola jinên ciwan di vir de giringe, ji ber ku yên vê berxwedanê bigihîne encamê, jinên ciwan in. Hem bi hêza jin û hem jî bi dînamîzma ciwantî jinên ciwan xwedî ev herdû taybetmendiyan e û dikare bi vî awayî hem tecrîdê bişkine, vê berxwedanê mezintir bike û bigihîne encamê. Berpirsyartiya mezin dikeve ser milê jinên ciwan. Jinên Ciwan pêwîste hem ji bo azadiya xwe, hem ji bo azadiya tevahî jinan û ciwanan têkoşînê mezintir bikin, zincîr û tecrîdê bişkînin.
