NAVENDA NÛÇEYAN- Têkildarî gefên Erdogan ên li dijî herêmên Bakurê û Rojhilatê Sûriyê, Meclisa Rêveber a Rêveberiya Xweser a Bakur û Rojhilatê Sûriyê daxuyaniyeke nivîskî weşand.
Daxuyanî wiha ye:
“Bi navê Meclisa Rêveber a Rêveberiya Xweser a Bakur û Rojhilatê Sûriyê daxuyanî û gefên dijminahî yên Erdogan li dijî herêmên me şermezar dikin. Erdogan ji destpêka aloziya Sûriyê ve hewl dide, beşek ji axa Sûriyê qut bike û tevlî nava axa Tirkiyê bike, bi vê yekê dixwaze sînorê El-Mîsaq Milî vegerîne. Armanca Erdogan ne tenê Bakur û Rojhilatê Sûriyê ye, armanca xwe yekitiya axa Sûriyê ye.
Di demeke ku DAIŞ`ê henaseyên xwe yên dawî li Dêrazorê dikşîne, Erdogan hewl dide bi rêya gefan Sûriyê dagir bike, da ku zextê li ser wê kêm bike û temenê wê dirêj bike. Di heman demê de, armanca dewleta Tirk derbkirina hevgirtina civakî ya Sûriyê û jiyana hevbeş a di navbera pêkhateyên gelê Sûriyê li Bakur û Rojhilatê Sûriyê ye, ji ber ku li ser xwe berjewendiyên xwe metirsî dibîne.
Her wiha ev daxuyaniyên dijminahî destkeftiyên ku Dewletên Koalîstona Navneteweyî ya şerê li dijî terorê û têkbirina wê di cihê wê yê herî dawî de, bidest xistine, armanc digre. Di heman demê de, rewşa ewlehiyê ya ku gelê me Sûriyê li Rojhilatê Firatê dijî, armanc digre, ji ber sîstema Tirkiyê ji rewşa ewlehiyê ne razî ye.
Em wekî Rêveberiya Xweser a Bakur û Rojhilatê Sûriyê bang li civaka navneteweyî û di serî de Neteweyên Yekbûyî û Koalîsyona Navneteweyî ya li dijî DAIŞ`ê dikin ku li dijî planên Erdogan ên dijminahî helwest bidin. Ji ber qanûna navneteweyî binpê dike û dagirkirin bixwe jî binpêkirina peyamên navneteweyî ye. Em bang li dewletên ku cihê xwe di nava NATO de digrin dikin ku li dijî siyasetên Erdogan bisekinin, ji ber ku ne li gorî rêgezên NATO`yê ye. Ji ber ku Erdogan herêmeke ku tu xeterî li ser ewlehiya wê çênake, dike hedef.
Di heman demê de, em bang li hikumeta Sûriyê jî dikin ku helwestekî fermî li dijî van gefan nîşan bide, ji ber ku Erdogan dixwaze beşekî ji axa Sûriyê dagir bike û ev yek jî tê wateya binpêkirina serweriya Sûriyê.
Her wiha em bang li hêzên demokratîk ên li herêmê û cîhanê dikin ku bi îradeya gelên herêmê re bisekinin û bi me re li dijî hevkarê DAIŞ`ê Erdogan bisekinin. Di heman demê de li dijî şerê qirkirinê yê ku Erdogan li dijî me ragihandiye bisekinin.
Em wekî Rêveberiya Xweser a Bakur û Rojhilatê Sûriyê seferberî radighînin, û bang li hemû gelê Sûriyê yên xwedî şeref dikin ku bi yek destî li dijî siyasetên dagirkirinê yên dewleta Tirk rabin. Îro roja ku em hemû hêza xwe ji bo parastina ax û gelê xwe bi kar bînin. Divê em her tiştî bikin ku yekitiya axa xwe û biratiya gelan biparêzin.”
