Serokê Şûbeya ÎHD’ê ya Wanê Murat Melek got tecrîd sûcekî mirovahiyê ye, tecrîda li ser Ocalan biryara hevpar a desthilatê û hêzên navnetewî ye.
NAVENDA NUÇEYAN – Serokê Şûbeya Wanê ya Komeleya Mafê Mirovan Murat Melet got tecrîda li ser Rêberê Gelê Kurd Abdullah Oclan bi rewşeke girankirî didome. Melet got biryara tecrîdê ne biryareke jirêzê ye û got, biryara tecrîdê ne biryareke wiha ye ku rêveberiya Girtîgeha Imraliyê an jî Wezareta Dadê bi serê xwe bikaribin bidin.
Melet got tecrîd biryareke hevpar a desthilata siyasî û hêzên navnetewî ye û domand, ”Ji ber ku tecrîda vê carê û girankirina şertên tecrîdê ya bi vî rengî, nehiştina ku parêzer û malbatê bibîne ne helwesteke jirêzê ye. Ev tecrîd naşibe demên dî yên tecrîdê.”
‘TECRÎDA VÊ CARÊ PIR CUDA YE’
Melet got heta niha gelek caran li ser rêzdar Ocalan tecrîd hatiye danîn û got, ”Lê tecrîda vê carê pir cihê ye. Ya pêşî, tecrîda di nav tecrîdê de heye. Ji mêj ve ye nahêlin ku kesî bibîne. Beriya niha Rewşa Awarte dikirin hêncet lê daxuyaniyên dawî xwe dispêrên cezayên disîplînê. Niha em baş bi vê dizanin; rewşa ku cezayên disîplînê bibin sedema tecrîdê zêde bi aqilê mirov nakeve, em dikarin bigihin wê bîr û baweriyê ku ne wiha ye.
Niha di tişta duya de cot standardî heye. Şertên ku ji bo ku girtî û cezaxwariyên dî têne kirin jî, ji bo Ocalan nayên kirin. Bi vî rengî tê xwestin ku birêz Ocalan û parêzeran, malbatê û kesên ku hewceyî ramanên birêz Ocalan in ji hev qut bikin, mesafeyekê deynin navbera wan. Biya me geşedanên dawî yên li Rojhilata Navîn jî bandorê li vê rewşê dikin. Ji ber ku Peymana Lozanê dikeve 100 saliya xwe. Ber bi 100 saliyê ve pêdivî bi ramanên nû heye. Bi vê çarçoweyê astengiyek tê danîn.”
‘RAWESTANDINA LI SER TECRÎDÊ RAWESTANDINA LI SER ŞER E’
Melet got divê tecrîd li ser ti girtî û cezaxwariyan nebe, diyar kir ku tecrîd sûcê mirovahiyê ye û li gel ku gelek caran ev gotine jî li ser tecrîdê rawestiyan e û domand, ”Dema muzakereyên aştiyê û diyalogê yên navbeyna 2013-2015’an Ocalan yek ji aliyê girîng bû û bû sedem ku hevdîtinên aştiyê dest pê bikin” û bi vê diyar kir ku rawestadina li ser tecrîdê ji hêlekê ve rawestandina li ser şer e.
Melet bal kişande ser krîza aborî ya li Tirkiyê û got, ”Di rewşa krîz û kaosê de hevdîtinên bi Ocalan re, ji bo krîz û kaos bi dawî bibe û ji bo demokratîkbûna Tirkiyê û hem jî ji bo demildest aştî were Tirkiyê wê xwedî kedeke mezin be.”
‘BÊDENGIYA CPT’YÊ NAYÊ FÊHMKIRIN’
Melet bi domdarî got, ”Em pir baş dizanin ku ti şer demokrasiyê nayînin Tirkiyê û Rojhilat Navîn. Ji bo ku zêdetir mafê mirovan neyê binpêkirin û rewşa aştiyê pêk were, pir hewce ye ku tecrîda li ser Birêz Ocalan rabe, her wiha hevdîtin jî demildest divê dest pê bikin.”
Melet li dijî bêdengiya raya giştî ya li ser tecrîda li ser Rêberê Gelê Kurd Abdullah Ocalan jî got, ”Mirova fêhm nake bê ka çima raya giştî ya cîhanê wiha bêdeng e, CPT çima hevdîtina ku kirî jî wiha rehet bi raya gitşî re par ve nake û hê jî li ser vê mijarê bêdeng e û saziyên mafê mirovan ên navnetewî li ser vê bingehê saziyên ku xebatan dikin çawa wiha bêdeng in. Ji bo vê em bang li hemû avaniyên navnetewî, saziyan û saziyên mafê mirovan dikin. Em dixwazin ku tecrîd demildest bi dawî bibe û li Tirkiyê pêvajoya muzakereyê dest pê bike.”
