Koordînasyona Komalên Ciwan sê gerîlayên 9 û 18’ê Tebaxê li Botanê şehîd bûn bi bîr anî. Koordînasyonê ji ber şehadeta gerîlayên bi navê Mazlûm Kobanê, Xemgîn Roj û Reşît Serdar sersaxî xwest.
NAVENDA NÛÇEYAN – Koordînasyona Komalên Ciwan daxuyaniyeke nivîskî da û got, “Li Botanê ku şahidiyê yek ji berxwedana herî bi heybet a Bakurê Kurdistanê dike, hevalên me Mazlûm Kobanê, Xemgîn Roj û Reşît Serdar ên bi ruhê Serî Hilde tevlî berxwedanê bûn, van rojên dawî şehîd bûn. Di serî de malbatên hêja yên hevalên me yên şehîd, em sersaxiyê ji gelê xwe yê welatparêz û hevrêyên wan dixwazin.”
Koordînasyonê destnîşan kir ku ne ji berxwedanê be pelek jî naheje û diyar kir ku yên rê li ber pêşketinên mezin vedikin, bêguman kesayetê pêşeng in.
Di dewama daxuyaniyê de hate gotin, “Di demekê de ku şer sor bû û faşîzm ji tirsa tinebûnê bi rengekî hovane êrîş dike, hevrêyên me Mazlûm Kobanê, Xemgîn Roj û Reşît Serdar ên bi fermandariya hevrê Atakan Mahîr, Cûdî Amed, Ronî Mûnzûr û Jînda Ezgî şer kirin, bi pêşengiya Fermandarê Ciwanan Baran Mawa bûn xeta jiyanê ya ciwanên Kurdistanê, di vê demê de heta fîşeka dawî li djiî mêtingeriyê bi ruhê Serî Hilde şer kirin. Tirs berdan dilê dijmin. Û navê xwe li rûpelên zêrîn ên berxwedana azadiyê nivîsandin.”
Koordînasyona Komalên Ciwan soz da ku wê tola hevrêyên xwe hilînin û di dawiyê de got, “Em ê şopdarên pratîka ciwanên şoreşger bin ku di şexsê hevalên Mazlûm, Xemgîn û Reşît de şênber bû. Em soza xwe dubare dikin ku em ê çeteyên faşîst ên AKP-MHP’ê têk bibin, di nava xwîna ku wan li Kurdistanê rijandine hesab bipirsin û tola wan hilînin. Em careke din ji malbatên hêja yên şehîdan û tevahiya gelê Kurdistanê re sersaxiyê dixwazin.”
