KNK’ê têkildarî dagirkeriya Tirkiyeyê ya li ser Başûrê Kurdistanê daxuyaniyeke nivîskî weşand û diyar kir ku divê xelkê Bakurê Kurdistanê di van hilbijartinên 24’ê Hezîranê da derseke mezin bidin Erdogan û partîya wî AKP’ê û desthilata wan hilweşînin.
NAENDA NÛÇEYAN – KNK’ê têkildarî dagirkeriya Tirkiyeyê ya li ser Başûrê Kurdistanê daxuyaniyeke nivîskî weşand û diyar kir ku divê xelkê Bakurê Kurdistanê di van hilbijartinên 24’ê Hezîranê da derseke mezin bidin Erdogan û partîya wî AKP’ê û desthilata wan hilweşînin.
Di daxuyaniya KNK’ê de ev tişt hatin diyarkirin:
“Bi navê dewleta Tirk serokkomar Tayyîb Erdogan, bi hêza hukûmeta xwe ya AKP’ê û piştevaniya eniya faşîst MHP û Ergenekonê dîsa dest bi lêdana dahola şer kiriye. Piştî dagiriya Efrînê niha jî berê artêşa xwe daye Başûrê Kurdistanê. Ev demeke dirêj e ku Erdogan digel hevçeperên xwe şerê dijî Kurd û Kurdistanê, ji bo xwe kiriye armanca sereke. Erdogan bi referansên dîroka dewleta Tirk ya antî Kurd û antî Kurdistan bi rê ketiye. Aqûbeta xwe ya şexsî û siyasî li ser rûxandina gelê Kurd program kiriye.
Bi zêdehî ve ji 2015’ê û vir ve hem li bakur, hem li başûr û hem jî li rojavayê Kurdistanê ji êrîşkarî û dagirkerîyê pê ve tiştekî nake. Ji bilî wêrankirina Sûra Amedê, Cizîr, Nisêbîn, Şirnex û Geverê, ji Cerablûsê heta Efrînê, ji Başîka heta Biradostê, artêşa xwe seferber kiriye ku ji bilî bakurê Kurdistanê, parçeyên dî yên Kurdistanê jî fetih bike. Erdogan desthilatdariya xwe li ser gola xwînê ava kiriye û dixwaze deshilata xwe li ser behra xwînê bidomîne.
Erdogan di her wextê têkçûna xwe da rêya şer û xwînê daye ber xwe. Di şikestina hilbijartina 2015’an de manewrayeke hîlebazîyê kir û şer da destpêkirin û di nav şer da careke dî hukûmeta xwe parast.
Tirkiye di destê Erdogan da her diçe di nav krîz û kaosa polîtîk û ekonomîk da xerq dibe. Erdogan da ku xwe ji vê belayê jî xilas bike, hilbijartinên gelek lez û pêşwext îlan kir û di 24ê Hezîranê de hem ji bo serokkomariyê hem jî ji bo parlementoyê hilbijartin wê bêne kirin. Ji hemû anket û lêkolînên li nav hilbijêran têne kirin rastiyek derdikeve pêş ku hem Erdogan hem jî hukûmeta wî ber bi ketinê ve ne.
Di vê hewaya hilbijartinan da Erdogan li garantîyekê digere ku dîsa bi dek û dolaban xwe bi ser bixe. Rêya herî rehet bo wî şerê dijî Kurd û Kurdistanê ye. Erdogan rêhtina xwîna Kurdan bo xwe kiriye şerbeta serkeftina xwe ya siyasî. Bi vê armanc û niyeta bêyom û bêbextane niha jî berê artêşa xwe daye Qendîlê. Eve demek e ku leşkerên xwe yên taybet ber bi navçeyên Biradostê rê kiriye. Ji hewayî ve jî bombardûmaneke xurt dikin.
Erdogan dixwaze ji Herêmên Parastinê yên Medyayê ku di bin kontrola HPG’ê de ye, ber bi Başûrê Kurdistanê ve baskê dagîrîya dewleta Tirk fireh bike û li dora Kurdistanê ablûkakayê vehûne. Erdogan Qendîl bo xwe kiriye sembola zaferê. Erdogan bi vê hemleyê ve dixwaze di hilbijartinên 24’ê Hezîranê bo xwe garantîyekê pêk bîne.
Mixabin dinya bêdeng e û Erdogan her diçe êrişkarîya dewleta Tirk zêdetir dike. Kurd li welat û li derve divê di nav aktîvîteyan da bin ku bala dinyayê bikêşînin ser vê erîşkariya dewleta Tirk û Erdogan.
KNK bi giringî dixwaze bala hemû Kurd û Kurdistanîyan bikêşe ser vê bûyerê ku hişyardarîyeke bilind pêk bînin û di nav vî hewayê hilbijartinên 24’ê Hezîranê da nekevine xefletekê.
Kurd pêkve, ji başûr, rojhilat, bakur heta rojavaya Kurdistanê û li diasporayê divê vê plana Erdogan sivik negirin û di nav hewildanên bergîriyê de bin.
Bi taybetî parlemento û hukûmeta Herême Kurdistanê û her weha hukûmeta Bexdayê divê operasyona leşkerî ya dewleta Tirk ya li ser Başûrê Kurdistanê bi xurtî şermezar bikin û rê li ber bigirin.
Erdogan, piştî dagîrîya Efrînê ‘Operasyona Qendîlê’ ji bo xwe kiriye parolaya serkeftina hilbijartinên 24’ê Hezîranê. Lewma divê xelkê Bakurê Kurdistanê di van hilbijartinên 24’ê Hezîranê da derseke mezin bidin Erdogan û partîya wî AKP’ê û desthilata wan hilweşînin.
Parastina Qendîlê îro ji sindoqa hilbijartinan ya li Amed, Wan, Hekarî, Cizîr û hemû Bakurê Kurdistanê û meydanên dîasporayê dest pê dike.
Divê Kurd û hemû Kurdistanî dijî dagirkerîya dewleta Tirk û êrîşkarîya Erdogan seferber bibin û Erdogan û hukûmeta AKP’ê, di sindoqa hilbijartinên 24ê Hezîranê da bi bin bixin û bi dengên bilind HDP’ê û Selahedîn Demirtaş bi ser bixin.”
